Jambylda ıisshil ıtterdiń kómegimen esirtkige qatysty 140-qa jýyq qylmys anyqtalǵan
TARAZ. QazAqparat – Jambyl oblysynda bıyl jyl basynan beri esirtkige qatysty 721 qylmystyq derek tirkelip, zańsyz aınalymnan eki jarym tonnadan astam ártúrli esirtki zattary tárkilenip, joıýǵa jiberilgen. Bul oraıda óńirdegi kınologtardyń úlesi de az emes, dep habarlaıdy QazAqparat tilshisi.
Jalpy aǵymdaǵy jyldyń on aıynda aımaqta zańsyz aınalymnan 2 tonna 708 keli esirtki zaty tárkilengen desek, bul kórsetkish ótken jyldyń esepti merzimimen salystyrǵanda 70 paıyzǵa kóp. Negizi elimiz boıynsha Jambyl óńirinde esirtki qylmysy erekshe jıi tirkeledi. Bul másele uzaq jyldardan beri sheshimin tappaı keledi. Tártip saqshylary qansha jerden qylmyskerlerdiń jolyn kesip, keshendi sharalardy qolǵa alǵanymen esirtki satyp, jeńil jolmen paıda tapqysy keletinder azaımaı tur.
Aıta keteıik, esirtki tasymaldaýshylar óz zańsyz áreketterin jaýyp, jasyrý úshin túrli qýlyqqa baratyny sózsiz. Bul turǵyda mamandarǵa qyzmettik ıtterdiń aıtarlyqtaı kómegi tııýde eken.
«Zańdy buzǵan qylmysker nege bolsa da barady. Sondyqtan kásibı daıyndalǵan ıisshil ıtterdiń kómegine az júginbeımiz. Oblysta sońǵy 10 aıda qyzmettik ıtterdiń kómegimen tek esirtkige qatysty 140-qa jýyq qylmys anyqtalǵan. Kınologtar ıtterdi tintý, izge túsý, kúzetýge beıimdep, ámbebap etip baptaýǵa tyrysady», - deıdi oblystyq esirtki qylmysyna qarsy is-qımyl basqarmasynyń basshysy Ashat Almetov.
Óńirdegi kınologtardyń biri Baýyrjan Іzbasarov bul salaǵa 5 jyl buryn kelgenin aıtady. Onyń senimdi serigi – Bava atty belgııalyq ovcharka ıti. Ony ol 8 aılyq kúshik kezinen kútip, baptaǵan. Bıyldyń ózinde jas maman 20-dan astam arnaıy jedel sharalarǵa qatysyp, ıisshil ıttiń kómegimen ondaǵan qylmyskerlerdi ustapty.
«Bul esirtki bıznesine qarsy kúres júrgizýde eń nátıjeli, ári tıimdi ádis túrleriniń biri. Mysaly osy jaqynda bolǵan nárse. Jýaly aýdanynda bir kólikti toqtatyp, ishinen qosymsha dóńgelekke jasyrylǵan marıhýana zaty tabyldy. Eki jarym kelideı. Mysaly sol kózge kórinbeıdi. Al ıttiń kómegimen dál taptyq»,- deıdi B.Іzbasarov.
