Jambylda gazdan ýlanýshylardyń sany 45 paıyzǵa artqan
TARAZ. QazAqparat - Jambyl oblysynda jylytý maýsymy bastalǵaly 22 gazdan ýlaný oqıǵasy tirkelgen. Sonyń saldarynan 35 adam zardap shegip, 9 adam kóz jumǵan, dep habarlaıdy QazAqparat.
Oblystyq tótenshe jaǵdaılar departamentinń málimetine súıensek, óńirde gazdan ýlaný oqıǵasy kóbeıgen. Atap aıtar bolsaq, aldyńǵy jyldarmen salystyrǵanda ýly gazdan zardap shekkender sany 45 paıyzǵa ósken. Bul oraıda mamandar oqys oqıǵanyń aldyn alý, tekserý, túsindirý jumystary kezinde birqatar kedergiler kezdesip otyrǵanyn aıtady.
«Kóbinese bizdi úılerine kirgizbeıdi. Esikterin ashpaıdy. Biz aralaǵandardyń ishinde birshama kemshilikter tabylǵan bolatyn. Al endi bizge kirip, aıyppul salý zańda qarastyrylmaǵan», -deıdi Taraz qalalyq TJB bas mamany Qaırat Orazbaev.
Aıta keteıik, bul boıynsha mamandar 100 myńǵa jýyq úıdi aralap, 300 myńnan astam adamnyń qatysýymen túsindirý jumystaryn júrgizipti. Sondaı-aq, 1500-ge tarta arnaıy reıd sharalaryn uıymdastyrǵan.
