Jambylda esirtkini jarnamalaıtyn 650-den astam graffıtı óshirildi
Jambyl oblysynda polıtsııa eriktilermen birlesip «Taraz esirtkige qarsy» aktsııasyn ótkizdi. Aktsııa barysynda esirtki satatyn saıttardy jarnamalaıtyn Tarazdaǵy úıler men ǵımarattardyń qabyrǵalaryndaǵy graffıtı jazbalar joıyldy. Reıd nátıjesinde qalada 130-dan astam, al jyl basynan beri 650-den astam jazba óshirildi.
Sonymen qatar, Jambyl oblysynyń polıtseıleri ınternet jelisine monıtorıng júrgizý arqyly Telegram qosymshasynda jumys istegen 35 saıtty anyqtady. Qazirgi ýaqytta atalǵan arnalar buǵattaldy, saıttar men jazbalardy ornalastyrýǵa qatysy bar adamdardy anyqtaý jáne ustaý boıynsha izdestirý is-sharalary júrgizilýde.
«Graffıtı jazǵany jáne ınternette kórsetilgen málimetterdi taratqany úshin Qylmystyq kodekstiń 299-1-baby 1-bóligi ıaǵnı, esirtkini nasıhattaý nemese zańsyz jarnamalaýǵa úsh jylǵa deıingi merzimge, 2-bóligi boıynsha úsh jyldan alty jylǵa deıingi merzimge bas bostandyǵynan aıyrý túrindegi jazasy kózdelgen. Esirtki belgisin jasaıtyndar esirtki saýdalaǵany úshin jaýap beredi jáne Qylmystyq kodekstiń 297-baby boıynsha qylmystyq jaýapkershilikke tartylady, onda bes jyldan 20 jylǵa deıin bas bostandyǵynan aıyrý, al jalpy bilim berý mekemelerinde esirtki zattaryn ótkizgeni úshin ómir boıyna bas bostandyǵynan aıyrý túrindegi qylmystyq jaýapkershilik kózdelgen», – dedi Jambyl oblysynyń polıtsııa departamenti Esirtki qylmysyna qarsy is-qımyl basqarmasynyń bastyǵy Asqar Jumabekov.
