Jambylda esirtkini nasıhattaıtyn 10 saıt buǵattaldy
Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń qyzmetkerleri «Jasyl el - Taraz» JShS jáne «Tabysty adamdardy tańdaý» qoǵamdyq birlestiginiń eriktilerimen birlesip, «Biz esirtkige qarsymyz!» atty kezekti aktsııasyn ótkizdi.
Bir kúnde oblys ortalyǵynda turǵyn úıler men memlekettik ǵımarattardyń qabyrǵasyndaǵy kod sózder men esirtki dıleriniń baılanys nómiri bar 80-nen astam graffıtı – jazý joıyldy. Sondaı-aq, oblystyq PD Esirtki qylmysyna qarsy is-qımyl basqarmasy qyzmetkerleri ınternet jelisin kúndelikti monıtorıngileý arqyly Telegram qosymshasynda esirtkini nasıhattaıtyn 10 saıtty anyqtady. Qazirgi ýaqytta bul saıttar buǵattaldy. Osy saıttar men jazýdy ornalastyrýǵa qatysy bar adamdardy anyqtaý jáne ustaý boıynsha izdestirý is-sharalary júrgizilip jatyr.
«Jambyl oblysynyń turǵyndaryna graffıtı-jazýdy jazǵany jáne jelide esirtkini nasıhattaıtyn málimet taratqany úshin Qylmystyq kodekstiń 299-1-babynyń 1-bóligi boıynsha úsh jylǵa deıin bas bostandyǵynan aıyrý, 2 – bóligi boıynsha úsh jyldan alty jylǵa deıin bas bostandyǵynan aıyrý túrindegi qylmystyq jaza kózdelgenin eske salamyz»,- dep atap ótti Jambyl oblysynyń Polıtsııa departamenti Esirtki qylmysyna qarsy is-qımyl basqarmasynyń bastyǵy Asqar Jumabekov.
