Jambylda densaýlyq salasyndaǵy qyzmetkerlerdiń 85 paıyzy – qyz-kelinshekter
TARAZ. QazAqparat – Jambyl oblysynyń əkimi Berdibek Saparbaev kópbalaly analar men túrli salada jetistikke qol jetkizgen əıelder qaýymyn saltanatty jaǵdaıda quttyqtady. Kezdesýge beıne-baılanys arqyly 300-den asa áıel qatysty, dep habarlaıdy QazAqparat tilshisi.
Kıeli Áýlıeata jeri de qashanda ardaqty apalar men asyl analardyń, ataqty eńbek maıtalmany atanǵan áıel azamattar men aıaýly arýlardyń mekeni. Kómeıinen jyr tógilgen aqyn Ulbıke, Uly Jeńis kúnin jaqyndatqan soǵys ardageri Zoıa Mamedova, adal eńbegimen el qurmetine bólengen Eńbek Eri, ortamyzda júrgen Márzııa Ibragımova, poezııadaǵy aq gúlimiz – Kúlásh Ahmetova syndy apalarymyz óńir maqtanyshy. Aımaqtyń damýy úshin aıanbaı ter tókken, búginde eńbek ardagerleri Lıdııa Ahmetova, Nilzııa Rahysheva, Bátes Egemberdıeva, Salıha Gaıdýlına, Kúlásh Ábdikeshova, Kúlásh Nazarbekova aımaqtyń qoǵamdyq-saıası ómirinen tys qalmaı, jas urpaq tárbıesine úles qosyp keledi.
«Sizderdi Halyqaralyq áıelder kúnimen quttyqtaımyn! Áıel – ulttyń uıytqysy, shańyraqtaǵy taǵylymdy tárbıeniń kózi, súıispenshilik pen syılastyqtyń altyn arqaýy. «Ana bir qolymen besikti terbetse, bir qolymen álemdi terbetedi» degen danalyq sóz bar. Qazirgi kezde qoǵamdyq ómirdiń kez kelgen salasyn áıeldersiz elestetý múmkin emes. Іstiń kózin taba bilgen kásipkerlerdiń 40 paıyzy áıel azamattar. Bilim salasyndaǵy qyzmetkerlerdiń 75 paıyzy, densaýlyq saqtaý salasynda 85 paıyzy, úkimettik emes uıymdarda da áıel kisilerdiń belsendiligi joǵary», – dedi Berdibek Saparbaev.
Alǵashqy bolyp sóz alǵan elge belgili saıasatker Nilzııa Rahysheva búginde oblysta atqarylyp jatqan jumystarǵa joǵary baǵalady. Odan keıin Qazaqstan Jazýshylar odaǵynyń múshesi, aqyn Aısha Kópjasarova «Ana» atty óleńin naqyshyna kelitirip oqyp berdi. Al Taraz qalalyq kópbeıindi aýrýhanasynyń pýlmonologııa dərigeri Nursulý Muhambetqalıeva barsha analarǵa arnaǵan quttyqtaýyn jetkizdi.
Aımaq basshysy dərigerlerdiń koronavırýspen kúrestegi eńbegine de erekshe toqtalyp ótti.
Óz kezeginde kásipker Anar Beksultanova taǵdyrdyń basyna salǵan aýyrtpalyǵymen kúrese otyryp, tyń kásip bastaǵany týraly aıtyp berdi.
«Anar, birinshi toptaǵy múgedek. Solaı bola tursa da ol óziniń isimen, jumysymen, iskerligimen on eki múshesi saý adamǵa úlgi bolyp, eńbek etseń maqsatyńa jetýge bolatynyn dáleldep otyr. Birinshiden ol – ana, ekinshiden – kásipker. Ulttyq ónerimizdi damytýda. Basqa jerlesterimiz Anardan úlgi alyp, kásip ashýǵa beıimdelý kerek», – dedi B. Saparbaev.
Saltanatty sharada polıtsııa podpolkovnıgi, kópbalaly ana Dılıafrýz Kenjehanovaǵa berildi. Dılıafrýz óziniń 5 balasymen birge balalar úıinen 4 balany asyrap alyp, tárbıe berýde.
«Árbir adam óziniń kindiq qany tamǵan jeriniń patrıoty bolýy tıis. Elbasymyz Nursultan Nazarbaev «Áıel – ómir tiregi ǵana emes, áıel – ómirdiń ózi» degen sózi ómirdiń máni men sánine aınalǵan ardaqty analarǵa, aıaýly qaryndastarǵa berilgen eń laıyqty baǵa dep bilemin. Búgingideı mereıli merekede ózderińizge elimizdiń gúldenýi jolyndaǵy qyzmetterińiz úshin alǵys bildiremin. Árqashan qushaqtaryńyz gúlge tolyp, júzderińizden kúlki ketpesin!»,– dep túıindedi oblys ákimi.
