Jambylda daǵdarysqa qarsy is-qımyl jospary bekitildi

TARAZ. QazAqparat – Oblys ákimi Berdibek Saparbaev óńirdegi áleýmettik-ekonomıkalyq ahýaldyń turaqtylyǵyn saqtaýǵa baılanysty jedel áreket etý shtabynyń otyrysyn ótkizdi, - dep habarlaıdy QazAqparat Jambyl oblysy ákimdiginiń resmı saıtyna silteme jasap.

«Álemdik ekonomıkanyń aǵymdaǵy jaǵdaıyna baılanysty Memleket basshysy jedel keńes ótkizip, naqty tapsyrmalar berdi. Basty mindet – azyq-túlik pen birinshi kezektegi qajetti taýarlar men janar-jaǵar maı baǵasynyń negizsiz ósýine jol bermeý, valıýta naryǵynda dúrligýdi boldyrmaý. Memlekettik organdar kún saıyn jaǵdaıdy qadaǵalap otyrýy qajet. Memleket basshysynyń tapsyrmasyna sáıkes, memlekettiń barlyq áleýmettik mindettemeleri tolyq kólemde oryndalady», - dep atap ótti Berdibek Saparbaev.

Ulttyq banktiń oblystyq fılıalynyń dırektory Evgenıı Sharygınniń aıtýynsha, oblys aýmaǵynda 102 aıyrbastaý pýnkti jumys isteıdi.

«Búgingi kúngi AQSh dollarynyń satylymdaǵy eń joǵarǵy baǵamy 396,6 teńgeni, ekinshi deńgeıli bankterde 398 teńgeni quraıdy. Barlyq bankter men aıyrbastaý pýnktteri ulttyq jáne shetel valıýtasynyń jetkilikti kólemimen qamtylǵan. Jalpy, jaǵdaı turaqty, dúrligýge negiz joq»,-dep sendirdi ol.

Shtab otyrysy barysynda daǵdarysqa qarsy is-qımyl jospary bekitildi. Onda áleýmettik mańyzy bar azyq-túlik ónimderi men birinshi kezekte qajetti taýarlar baǵasynyń ósýine jol bermeý, halyqtyń áleýmettik osal toptaryn qoldaý, jumys oryndaryn saqtaý jáne qurý, jalaqyny ýaqtyly tóleý, ShOB jáne ekonomıkanyń naqty sektoryn damytýǵa basymdyq berilgen.