Jambylda bıýdjettik nysandary jylytý maýsymyna 100 paıyz daıyn

TARAZ. QazAqparat – Jambyl oblysy aldaǵy jylý berý maýsymyna daıyn. Gaz, elektr energııasyn jetkizýde irkilis bolmaıdy.

Bul týraly oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Qudaıbergen Qorǵanbaev aıtty, dep habarlaıdy QazAqparat tilshisi.

Basqarma basshysy orynbasarynyń aıtýynsha, óńirdegi jylýmen jabdyqtaý nysandarynyń qysqa daıyndyǵy 99,8 paıyzdy quraıdy. Onyń ishinde 437 qazandyq júz paıyzǵa daıyn eken.

«Barlyǵy 340 km bolatyn jylýmen jabdyqtaý jelileriniń 338,5 km-i nemese 99,6 paıyz daıyndaldy. 969,2 km sý qubyry jelileriniń 21,1 km-i jóndeý josparlanǵan, ol tolyǵymen oryndaldy. Bıýdjettik salanyń 1 670 nysany júz paıyzǵa daıyn. Al, oblystaǵy 1 593 kóppáterli turǵyn úıdiń qysqy maýsymǵa 1 579 nemese 99,1 paıyzǵa daıyn»,- deıdi ol.

Sondaı-aq, Qudaıbergen Qorǵanbaev aımaq turǵyndaryn otynmen qamtamasyz etý jumystary týraly aıtyp berdi.

«Bıýdjettik sala nysandaryna qysta 66,4 myń tonna kómir satyp alý josparlanǵan. Halyqqa 254,6 myń tonna kómir qajet bolsa, búginde onyń tek 58 paıyzy ǵana jetkizildi. Búgingi tańda qoldanystaǵy gaz ben mazýttyń baǵasy boıynsha Qarataý jáne Jańatas qalalary boıynsha jalpy qajettilik 1,1 mlrd teńgeni quraıdy. Tıisti qarajattar qarastyrylýda»-deıdi spıker.

Aıta ketý kerek, «Nurly jol» ınfraqurylymdyq damý memlekettik baǵdarlamasy aıasynda qalanyń aýmaǵynda bıyl M-2 jáne M-4 jylý magıstraldary qaıta jańǵyrtylýda.

Jumystar Sypataı batyr, Kósheneı, Qoıgeldi, Nıetqalıev, Qazybek bı, Aqqozıev, Aqqoshqar Áýlıe, M.-H. Dýlatı, Komratov, Qonaev jáne Abaı, Jambyl, Tóle bı dańǵyldarynda ótedi.

Ótken jyly 1,7 mıllıard teńge bólinip, 6,2 shaqyrym jylý magıstrali qaıta jóndelse, osy jyly jumys kólemi aıtarlyqtaı artyp, 7,6 mıllıard teńge bólingen bolatyn. Bul kelesi jyldan bastap qala turǵyndaryna ystyq sýdy jaz aılarynda úzdiksiz berýge múmkindik jasamaq.