Jambylda buzaqylar kúzetshini pyshaqtap ketti
TARAZ. QazAqparat - Taraz qalasynda «Alnur» demalys aımaǵynda buzaqylar kúzetshini jaraqattady, dep habarlaıdy «QazAqparat» HAA tilshisi Jambyl oblystyq ІІD baspasóz qyzmetine silteme jasap.
«20 shilde kúni ІІB JBO-ǵa Taraz qalasyndaǵy №1 aýrýhanaǵa «Alnur» demalys aımaǵynyń 21 jastaǵy kúzetshisi pyshaqtalyp túskeni týraly habarlama kelip túsken. Bul fakti QR QK 293-baby 3-tarmaǵy boıynsha sotqa deıingi tergeýdiń biryńǵaı tizilimine sýyq qarýdy qoldaný arqyly jasalǵan buzaqylyq retinde tirkeldi», - dep túsindirdi oblystyq ІІD baspasóz qyzmeti.
Tergeý barysynda anyqtalǵandaı, 20 shilde kúni belgisiz bireý qoǵamdyq tártipti buzǵan, al kúzetshi ony toqtatpaqshy bolǵanda, buzaqy oǵan dórekilik tanytqan. Osylaısha, ekeýiniń arasynda janjal bolǵan. Budan keıin buzaqy demalys aımaǵynyń kúzetshisin ótkir quralmen jaraqattap, oqıǵa ornynan izin sýytqan.
Jedel-tergeý toby oqıǵa ornynda tekserý júrgizip, kýágerlerden surastyryp, vıdeomaterıaldardy qaraǵan. «21 shilde kúni qylmystyq is QR K 106-baby 2-tarmaǵy boıynsha buzaqylyq saldarynan densaýlyqqa qasaqana aýyr zııan keltirý retinde qaıta tirkeldi. Polıtsııa qyzmetkerleri 19 jastaǵy azamatty ustady, tergeý barysynda ol óz kinásin moıyndady», - dep naqtylady oblystyq ІІD qyzmetkeri.
