Jambylda búgin koronavırýstan jazylǵan 13 adamnyń tórteýi – stýdent
TARAZ. QazAqparat – 21 sáýir kúni Jambyl oblysynda taǵy 13 adam koronavırýs ınfektsııasynan emdelip shyqty, dep habarlaıdy QazAqparat oblys ákimdiginiń resmı saıtyna silteme jasap.
KVI anyqtalǵan naýqastardy emdeý bastalǵaly beri bul - alǵashqy jappaı shyǵarý bolyp otyr. Olardyń qatarynda elimizdiń ár aımaqtarynan kelgen emdelýshiler bar. Atap aıtsaq, Soltústik Qazaqstan jáne Túrkistan oblystary, Nur-Sultan, Shymkent jáne Qostanaı qalalary, sondaı-aq Jambyl oblysy Qordaı aýdanynyń turǵyndary.
Em alǵandardyń tórteýi – Shymkent qalasynyń turǵyndary desek, onyń ekeýi - 1996 jáne 1999 jyly týǵan stýdentter. Olar alty jolaýshysynan koronavırýs anyqtalǵan Delı-Taraz reısinde bolǵan. Al, 1975 jáne 1980 jyly týǵan qalǵan ekeýi Qyrǵyz Respýblıkasynan úlken júk kóligin aıdap kelgen júrgizýshiler. Shekarada olardan atalǵan ınfektsııaǵa alynǵan taldaý qorytyndysy oń nátıje kórsetken.
Sondaı-aq, Túrkistan oblysynyń 1986 jyly týǵan jáne Nur-Sultan qalasynyń 1994 jyly týǵan turǵyndaryniki de osyǵan uqsas jaǵdaı. Olar kórshi respýblıkadan úlken júk kóligimen kelgen kezde shekarada taldaý alynyp, COVID-19 bar ekendigi rastalǵan.
1999 jyly týǵan JOO stýdenti - Qordaı aýdanyna kelgen Qostanaı qalasynyń turǵyny.
Delı-Taraz reısimen jetkizilgen 2000 jyly týǵan taǵy bir stýdent Soltústik Qazaqstan oblysynyń turǵyny bolsa, al 1954 jyly týǵan em alýshy - elordalyq.
Qalǵan tórt adam - 28-45 jas aralyǵyndaǵy Qordaı aýdanynyń turǵyndary. Olardyń arasynda eki úlken júk kóliginiń júrgizýshisi, aýyr otadan keıingi emdelýshi jáne naýqaspen jaqyn baılanysta bolǵan tulǵalar bar.
Barlyq 13 tulǵa eki apta boıy ınfektsııalyq statsıonarda bolyp, emdeý sharalaryn oıdaǵydaı ótkizgen. Algorıtmge sáıkes, olardan KVI-ǵa eki ret qaıtalama zerthanalyq taldaý alynyp, dertten aıyqqany rastaldy.
Barlyq emdelip shyqqandar úshin arnaıy tasymal uıymdastyrylyp, turǵylyqty jerine jetkizildi. Shalǵaı qalalarda turatyn emdelýshilerge arnaıy avtokólik qarastyryldy.
Aldaǵy eki apta boıy olar úı karantıninde dárigerlerdiń baqylaýynda bolady.
Búgingi tańda ınfektsııalyq statsıonarda 37 naýqas em alýda, jaǵdaılary turaqty.
Jalpy, aımaqta osymen koronavırýstan 24 adam saýyǵyp shyqty.
