Jambylda bıyl jol-kólik oqıǵasynan 130-dan asa adam mert bolǵan
TARAZ. QazAqparat – Jambyl oblysynyń polıtsııa departamenti júrgizýshilerdi joldarda abaı bolýǵa shaqyrady,- dep habarlaıdy QazAqparat tilshisi.
Aǵymdaǵy jyldyń 10 aıynyń qorytyndysy boıynsha Jambyl oblysynda 778 jol-kólik oqıǵasy tirkelgen desek, onyń saldarynan 134 adam qaıtys bolyp, 1157 adam jaraqat alǵan. Bul týraly oblystyq Polıtsııa departampentiniń baspasóz qyzmeti habarlady.
Departament qys mezgili jol asa saqtyqty jáne árbir júrgizýshiden barynsha muqııat bolýdy talap etetin eskertedi.
«Klımattyq ózgeristerge baılanysty qysta joldyń jaǵdaıy aıtarlyqtaı nasharlaıtyny baıqalady. Jol qozǵalysyna qatysýshylarǵa eldi mekenderden tys jerlerge shyǵýǵa shekteýge keńes beremiz. Aýa-raıy men joldardyń jabylýyna qatysty arnaıy habarlamalardy negizge alyp otyrý qajet», - delingen vedomstvo habarlamasynda.
Sondaı-aq, jol qozǵalysyna qatysýshylardyń (tájirıbesiz júrgizýshilerdiń, jaıaý júrginshilerdiń, velosıped, mototsıkl júrgizýshilerdiń jáne jolaýshylardyń) qaza bolýy men zardap shegýiniń negizgi jáne jıi kezdesetin sebebi olardyń jol qozǵalysy erejelerin buzýy bolyp tabylatyndyǵy aıtylǵan. Qysta jol-kólik oqıǵalarynyń jıi kezdesetin taǵy bir sebebi retinde kólik dóńgelekteriniń aýa-raıynyń jaǵdaıyna sáıkes kelmeýi jáne eń aldymen protektor úlgisiniń joǵary deńgeıde tozýy ekendigine nazar aýdartyp, qysta óte saq ári muqııat bolýǵa shaqyrady.
