Jambylda bıyl kópbalaly analarǵa arnalǵan 12 jataqhana paıdalanýǵa beriledi

TARAZ. QazAqparat – Jambyl oblysynda kópbalaly jáne az qamtylǵan otbasylar úshin 612 páterli 12 jataqhana salynyp jatyr. Bul týraly óńirlik kommýnıkatsııalar qyzmetiniń aqparat alańynda ótken brıfıngte Jambyl oblysy ákiminiń orynbasary Erkebulan Daýylbaev aıtty, dep habarlaıdy QazAqparat tilshisi.

«Oblys ákiminiń bastamasymen turǵyn úı kezeginde turǵan kópbalaly otbasylarynyń kezegi kelgenshe baspanamen qamtý maqsatynda 612 páterli 12 jataqhananyń qurylysy júrgizilýde. Jyl sońyna deıin 478 páterli 9 jataqhanany paıdalanýǵa berý josparlanǵan. Qalǵan 3 jataqhana 2020 jyly tapsyrylatyn bolady», - dedi Erkebulan Daýylbaev. Sondaı-aq, ol jalpy bıýdjet esebinen bıyl 2 195 adamdy baspanamen qamtamasyz etý kózdelip otyrǵanyn jetkizdi.

Aıta keteıik, atalǵan jataqhanalarda kópbalaly jáne az qamtylǵan otbasylar turǵyn úı kezegi kelgenshe ýaqytsha panalaı alady.

Búginde oblys boıynsha turǵyn úı kezegine 1 800-ge jýyq kópbalaly otbasy tirkelse, ol elimizdegi kezekte turǵan 28 100-den astam kópbalaly otbasynyń 6,2 paıyzyn quraıdy.