Jambylda bıyl kámeletke tolmaǵandarǵa qatysty 138 qylmystyq is tirkelgen

TARAZ. QazAqparat – Jambyl oblysynda bıylǵy jyldyń 10 aıynda kámeletke tolmaǵan jasóspirimderge qatysty 138 qylmystyq is tirkelgen, dep habarlaıdy QazAqparat tilshisi.

Naqtyraq aıtsaq, óńirde jyl basynan beri oqýshy zorlyǵyna qatysty 8, jynystyq sıpattaǵy zorlyq-zombylyqtyń 5, 16 jasqa tolmaǵandarmen jynystyq qatynasqa túsýdiń 17 deregi jáne taǵy da basqa qylmystar anyqtalǵan. Bul týraly óńirlik kommýnıkatsııalar qyzmetinde ótken brıfıngide aıtyldy.

Onda Jambyl oblysy aýmaǵynda 9 qarashadan bastalǵan «Zorlyq-zombylyqsyz jáne qatigezdiksiz balalyq shaq» respýblıkalyq aqparattyq naýqanynyń barysy baıandaldy. Oblystyq bilim basqarmasy basshysynyń orynbasary Talǵat Jamalov Bilim jáne ǵylym mınıstrliginiń balalar quqyqyǵyn qorǵaý komıtetiniń uıymdastyrýymen ótetin naýqan 20 qarashaǵa deıin sozylatynyn jetkizdi. Shara balalarǵa qatysty qatigezdik qarym-qatynastarǵa qoǵam nazaryn burý, balalar ómirine beı-jaı qaramaý maqsatyna negizdelgen.

Aqparattyq naýqan aıasynda aımaqta 15-ke jýyq túrli is-shara ótpek. Olardyń qatarynda túngi reıdterden bastap, onlaın-semınarlar men esse jazý, foto konkýrs sekildi sharapatty sharalar uıymdastyrylatynyn aıtty.

«Bıyl kámeletke tolmaǵandarǵa qarsy qylmystyń aldyn-alý maqsatynda prokýratýra, bilim berý jáne densaýlyq saqtaý organdarymen 2 myńǵa jýyq birlesken reıd júrgizildi. Onyń 1 400-i mektepter mańynda ótti. Nátıjesinde 5 400-den astam ákimshilik quqyq buzýshylyq anyqtaldy. Onyń 3 myńǵa jýyǵy kámeletke tolmaǵan balanyń túnde úıden tys jerde júrýine qatysty bolyp otyr», - dedi Talǵat Jamalov.