Jambylda bıyl 90-nan astam sport alańy salynady
Bıyl Jambyl oblysynda sporttyq ınfraqurylymdy jańǵyrtý boıynsha 120 joba júzege asyrylýda. Onyń ishinde 13 jańa dene shynyqtyrý-saýyqtyrý kesheni (DSK) jáne 92 sport alańshasy bar. Taǵy eki stadıon kúrdeli jóndeýden ótedi dep kózdelse, úlken tennıs ortalyǵy qaıta jańartylmaq. Sonymen qatar, 12 nysanda aǵymdaǵy jóndeý jumystary júrgizilmek.
Bul oraıda Taraz qalasynda 41 joba júzege asyrylyp jatqandyǵyn aıta ketý kerek. Olardyń qatarynda úsh deneshynyqtyrý-saýyqtyrý kesheni, 35 alań, bir mektep stadıonyn aǵymdaǵy jóndeý, «Ulan» stadıonyn kúrdeli jóndeý jáne tennıs ortalyǵyn qaıta jańartý jumystary bar.
Oblys ákimi Berdibek Saparbaev Taraz qalasyndaǵy atalǵan sport qurylystaryn aralap, jumystarymen tanysty.
Aımaq basshysy shyǵyndardy ońtaılandyrýdy, joba qundaryn tómendetýdi, merdigerlerden bıznestiń áleýmettik jaýapkershiligi aıasynda jaqyn mańdaǵy áleýmettik mekemelerge kómek kórsetýdi talap etti.
- Alańdar halyqtyń barlyq sanattary úshin qoljetimdi jáne jergilikti jastardyń jıi keletin ortalyǵyna aınalýy tıis. Bizge jambyldyqtardy jappaı sportqa tartý kerek. Sport alańdary men basqa da nysandar bos turmaýy tıis. Bul rette jastardyń bos ýaqytyn tıimdi uıymdastyrý óskeleń urpaqtyń densaýlyǵyn nyǵaıtýǵa jáne jasóspirimder qylmysynyń deńgeıin tómendetýge yqpal etedi. Eshkim bıýdjet qarjysyn eseptemeıdi. Keıbir jobalardyń quny óte joǵary. Bıýdjettik baǵdarlamalar ákimshileri jobany ázirleý barysynda baqylaýdy, shyǵyn mólsherin barynsha ońtaılandyrý jáne qurylys sapasyna monıtorıng júrgizýi qajet, - dedi oblys ákimi Berdibek Saparbaev.
