Jambylda bir jylda 15 sport kesheni, 92 alańsha salynǵan
NUR-SULTAN. QazAqparat - Jambyl oblysynyń ákimi Berdibek Saparbaevtyń tóraǵalyǵymen ótken jıynda buqaralyq sportty damytý máseleleri talqylandy, dep habarlaıdy QazAqparat.
Oblys ákimdigi dene shynyqtyrý jáne sport basqarmasynyń basshysy Nurbol Júnisbekov buqaralyq sportty damytýdyń 2020-2025 jyldarǵa arnalǵan óńirlik baǵdarlamasynyń oryndalýy týraly baıandady.
Onyń aıtýynsha, búgingi tańda dene shynyqtyrý jáne sportpen júıeli túrde aınalysatyn turǵyndardyń úlesi 33,5 paıyzdy qurap, ótken jylmen salystyrǵanda 1,7 paıyzǵa ósken. Jyl sońyna deıin bul kórsetkishti 35 paıyzǵa jetkizý kózdelýde. Oblys boıynsha 2725 sport nysany jumys isteıdi.
Qazirgi tańda barlyq oqý-jattyǵý jıyndary karantındik sanıtarlyq talaptarǵa sáıkes júrgizilýde. Sporttyq sharalar ashyq aspan astyndaǵy alańdarda ótýde.
«Ótken jyldyń ózinde oblysta 15 dene shynyqtyrý-saýyqtyrý kesheni, 92 sport alańshasy salyndy. Jańa nysandarda 84 sporttyq sektsııa ashylǵan. Biraq barlyq nysandar tańerteńnen keshke deıin ashyq dep aıta almaımyz. Balalar demalys kúnderi olarǵa kire almaıdy. Sonda biz bul nysandardy kim úshin saldyq? Balalar jazǵy demalystaryn tıimdi ótkizýi kerek. Olardyń oınaıtyn, sportpen aınalysatyn jáne demalystaryn paıdaly ótkizetin oryndar jetkilikti. Tek bul baǵyttaǵy jumystardy durys uıymdastyrý qajet», - dedi Berdibek Saparbaev aýdan ákimderine.
Aýdan ákimderi, sport mektepteriniń dırektorlary jattyqtyrýshylardyń eńbek demalysynda ekenin aıtyp, aqtaldy.
«Balalardyń ózderine yńǵaıly ýaqytta kele alatyndaı etip dene shynyqtyrý - saýyqtyrý keshenderiniń jumys kestesin jasańyzdar. Sport, mádenıet, bilim bólimderi birlesip, mektepterdegi akt jáne sport zaldary bos bolmaıtyndaı is-sharalar josparyn qurý kerek», - dep talap etti oblys ákimi.
Nurbol Júnisbekov barlyq aýyldyq okrýgterdi sport nusqaýshylarymen qamtamasyz etý, balalar men jasóspirimderdiń dene shynyqtyrý úıirmelerin ashý qajettigin alǵa tartty. Aımaq basshysy aýdan ákimderine bul máselelerdi sheshýdi tapsyrdy. Berdibek Saparbaev salalyq basqarmanyń respýblıkalyq sport federatsııalarymen tyǵyz yntymaqtastyqta jumys isteý kerektigine nazar aýdartty.
Berdibek Saparbaev salalyq basqarmanyń respýblıkalyq sport federatsııalarymen, barlyq sport mektepterimen, ásirese aýyldyq jerlermen tyǵyz baılanysta bolý kerektigin atap kórsetip, talanttardyń kópshiligi sol jaqtan shyǵatynyn tilge tıek etti. Aýdan ákimderi men dene shynyqtyrý jáne sport basqarmalary demeýshilerdi tarta otyryp, «Týǵan jerge taǵzym», «Jomart túlek» jobalary aıasynda jumys isteý kerek.
