Jambylda bir kúnde 700-den astam jol erejesi buzylǵan
TARAZ. QazAqparat – Jambylda «Qaýipsiz jol» profılaktıkalyq is-sharasynyń birinshi kúni 700-den astam jol qozǵalysy erejelerin buzýshylyq anyqtaldy, dep habarlaıdy QazAqparat tilshisi.
Bıyl Jambyl oblysynyń aýmaǵynda «Qaýipsiz jol»profılaktıkalyq is-sharasy ótkizilýde. Іs-shara júrgizýshilerdiń kólik tártibin arttyrý, jol-kólik oqıǵalarynyń sanyn azaıtý, sondaı-aq jol qozǵalysy erejelerin buzýshylyqtyń aldyn alý maqsatyna negizdelgen.
«Іs-sharanyń birinshi kúniniń ózinde 728 jol qozǵalysy erejelerin buzýshylyq anyqtaldy. Onyń ishinde 111 jaıaý júrginshilerge qatysty bolsa, 45 júrgizýshi kólikti basqarý kezinde uıaly telefondy paıdalanǵandyǵy belgili boldy. 153 fakt jyldamdyqty arttyrýy boıynsha, 68 júrgizýshi qaýipsizdik beldigin taqpaǵandyǵy úshin jaýapqa tartylǵan. Sondaı-aq, manevr jasaý erejelerin buzǵany úshin 51 adam toqtatylsa, 16 júrgizýshi mas kúıinde kólik tizgindegeni anyqtalǵan. Aıyppul turaǵyna barlyǵy 12 kólik qoıyldy», delingen oblystyq polıtsııa departamenti baspasóz qyzmetiniń málimdemesinde.
