Jambylda bir aptada jol erejesin buzǵan 1100-den asa júrgizýshi jaýapqa tartyldy
TARAZ. Qazaqparat – Jambyl oblysynyń aýmaǵynda respýblıkalyq mańyzy bar avtojoldarda patrýldik polıtsııa qyzmetkerleri bir apta ishinde 1120 ákimshilik quqyq buzýshylyqty anyqtady,- dep habarlaıdy qazaqparat tilshisi.
Jol-kólik oqıǵalarynyń aldyn alý jáne júrgizýshiler arasynda kólik júrgizý mádenıetin arttyrý maqsatynda Jambyl oblysynyń Polıtsııa departamenti patrýldik polıtsııa batalonynyń jeke quramymen óńirdegi respýblıkalyq mańyzy bar avtojoldarda jol qozǵalysy erejelerin buzý áreketterin anyqtaý boıynsha jumystar jandanýda.
«Bir apta ishinde patrýldik jasaqtar júrgizýshilerdiń jol qozǵalysy erejelerin buzýy boıynsha 1120 ákimshilik hattama toltyrdy. Máselen, jyldamdyq rejımin asyrǵany úshin 496 júrgizýshi ákimshilik jaýapqa tartyldy. Sondaı-aq, 46 derek – jol qıylysynan ótý erejelerin buzýǵa qatysty, 18 derek – qaýipsizdik beldigin taqpaı júrgenine, alty derek – kólik basqarǵanda uıaly telefondy paıdalanýy boıynsha tirkeldi», – dedi Jambyl oblysynyń PD PPB komandıriniń orynbasary Tańat Álishev.
Sonymen qatar, jol qozǵalysy erejelerin buzǵany úshin 67 jaıaý júrginshige de qatysty ákimshilik hattama toltyrylǵan. Sondaı-aq eki júrgizýshi apattyq jaǵdaı týǵyzǵany úshin, al bir júrgizýshi mas kúıinde trassaǵa shyqqany úshin jaýapqa tartyldy.
