Jambylda bilim kúni 42 bala tún jarymynda kóshede qydyryp júrgen
1 qyrkúıekte kámeletke tolmaǵan jasóspirimderdiń qaýipsizdigin qamtamasyz etý maqsatynda oblys aýmaǵynda jergilikti tekserý júrdi.
Josparlanǵan is-sharalardy iske asyrý barysynda ıývenaldy polıtsııa ınspektorlary turǵyn úı aýlalarynda, saıabaqtarda jáne jastar kóp jınalatyn oryndarda reıd ótkizdi.
Sol túni ishki ister organdaryna 42 kámeletke tolmaǵan jasóspirim jetkizildi,
46 ata-ana men zańdy ókil ákimshilik jaýapkershilikke tartyldy.
Kámeletke tolmaǵandardyń túngi mezgilde oıyn-saýyq ornynda júrgeni úshin 1 kafe qojaıyny jaýapkershilikke tartyldy.
– Jańa oqý jylynyń bastalýyna oraı kóńil kóteretin búkil oıyn-saýyq oryndary men jastar kóp jınalatyn jerler quqyq qorǵaý organdarynyń jiti nazarynda bolady. Bizdiń mindetimiz – balalardyń qaýipsizdigin qamtamasyz etý jáne jasóspirimder jasaǵan jáne olarǵa qatysty quqyq buzýshylyqtardyń aldyn alý. Ata-analardan balasynyń bos ýaqytyn jáne baılanys ortasyn qadaǵalaýyn suraımyz. Balalardyń eshbir qadaǵalaýsyz júrýi zańǵa qaıshy áreket jasaýǵa sebep bolýy múmkin, – dep habarlady Jambyl oblysynyń PD jergilikti polıtsııa qyzmeti basqarmasy ıývenaldyq polıtsııa tobynyń aǵa ınspektory Oksana Semenova.
Foto: polisia.kz
