Jambylda bes jylda 700-den asa azamat radıkaldy dinı kózqarastan bas tartqan
Oblysta destrýktıvti dinı aǵymdardyń músheleri sanalatyn radıkaldy dinı kózqarasty jaqtaýshylardyń sany jyl sanap azaıyp keledi. Mysaly, 2016 jyly – 1380 bolsa, 2019 jyldyń búgingi kúnine – 911-ge azaıyp otyr. Jalpy, 2015 jyldan beri júrgizilgen ońaltý jumystarynyń nátıjesinde, 709 azamat radıkaldy dinı kózqarastarynan bas tartqany belgili bolǵan. Bul týraly oblys ákimdiginiń din isteri basqarmasynyń basshysy Jangeldi Omarov málimdedi.
Onyń aıtýynsha basqarma destrýktıvti dinı ıdeologııanyń aldyn alý jumystaryna erekshe mán berip otyr.
Atalǵan jumystar QR Ulttyq qaýipsizdik komıtetiniń Jambyl oblysy boıynsha departamentimen birlese otyryp, QR Aqparat jáne qoǵamdyq damý mınıstrliginiń Din isteri komıteti tarapynan usynylǵan ońaltý krıterıılerine sáıkes júrgizilýde eken.
«Basqarma destrýktıvti dinı ıdeologııaǵa qarsy turý baǵytynda meshit ımamdarynyń biliktiligin arttyrý jumystaryn júrgizdi. Taraz qalasyndaǵy «Hıbatýlla Tarazı» medresesinde destrýktıvti dinı ıdeologııaǵa qarsy ımmýnıtet qalyptastyrý maqsatynda oblystaǵy 130-ǵa jýyq meshit ımamdarynyń biliktiligin arttyrý kýrstary ótti. Ony Almaty, Nur-Sultan qalalarynan kelgen ǵylymı dárejeli oqytýshylar quramy júrgizgen bolatyn. Oblys kóleminde, sheteldik dinı oqý oryndarynda oqıtyn 21 azamat bar. 21 azamattyń 12-i kúmándi, 9-y senimdi dinı oqý oryndarynda Qazaqstan musylmandary dinı basqarmasynyń joldamasymen bilim alýda»,-deıdi Jangeldi Omarov.
Sondaı-aq, óńirde ınternet keńistiginde dinı ekstremıstik jáne terrorıstik mazmundaǵy aqparattardyń taralýynyń aldyn alý boıynsha monıtorıng jumystary turaqty júrgizilýde. Bıylǵy jyldyń esepti merzimi ishinde, 1500-ge jýyq kúdikti silteme anyqtalyp, QR Aqparat jáne qoǵamdyq damý mınıstrliginiń Din isteri komıtetine arnaıy dintaný saraptamasyna joldanylypty. Budan bólek, oblysta 40-qa jýyq dintanýshylar men teologtar jáne meshit ımamdary blogerlik jumystarǵa tartylyp, qarsy nasıhat jumystary uıymdastyrylǵan.
«Esepti merzim ishinde ınternet keńistiginde 2500-den astam qarsy nasıhattyq aqparat jarııalanyp, kópshiliktiń oń baǵasyn aldy. Halyqtyń dinı saýatyn kóterý máselesine de kóp mán berilýde. Basqarma jastar arasynda profılaktıkalyq jumystardy júrgizýge erekshe nazar aýdarǵan. Aqparattyq-túsindirý jumystary orta, tehnıkalyq, kásibı jáne joǵary bilim berý uıymdarynda turaqty túrde ótkizilýde. Mysaly, jyl basynan beri oblys kóleminde jastar men jasóspimiderge bilikti dintanýshynyń qatysýymen 450-ge jýyq is-shara ótkizilip, 20 myńnan astam adam qamtyldy»,- deıdi basqarma basshysy.
Aıta keteıik, oblysta barlyǵy 347 memlekettik tirkeýden ótken dinı birlestik pen fılıal bar. Onyń ishindegi 301 meshitte 403 dinı qyzmetker eńbek etedi. 301 meshittiń barlyǵyna beınebaqylaý júıesi ornatylǵan.
