Jambylda bes kúnde mas kúıinde kólik júrgizgen 22 adam ustaldy
Júrgizýshiler arasynda kólik tártibin arttyrý, jol-kólik oqıǵalarynyń sanyn azaıtý, sondaı-aq jol qozǵalysy erejelerin buzýdyń aldyn alý maqsatynda oblys aýmaǵynda «Qaýipsiz jol» jedel-aldyn alý is-sharasy ótip jatyr.
Shara barysynda oblys joldarynda, ásirese túngi ýaqytta patrýldik polıtsııa jasaqtarynyń tyǵyzdyǵy arttyryldy.
Atalǵan is-sharalar sheńberinde bes kúnniń ishinde polıtsııa qyzmetkerleri jol qozǵalysy erejelerin buzýǵa qatysty 3 447 ákimshilik buzýshylyqty anyqtap, jolyn kesti.
Onyń ishinde – 327 óreskel buzý deregi, onyń 37-i qoǵamdyq kólik júrgizýshileri tarapynan jasalǵan.
«Memlekettik nemese mindetti tehnıkalyq baıqaýdan ótpegen kólik quralyn basqarýdyń 119 deregi anyqtaldy. Baǵdarshamnyń tyıym salatyn belgisine qaramastan júrgeni úshin 75 júrgizýshi, jaıaý júrginshilerge nemese jol júrisiniń ózge de qatysýshylaryna qozǵalys kezinde basymdyq bermegeni úshin 54 júrgizýshi jáne apattyq jaǵdaı týǵyzýǵa ákep soqqan jol qozǵalysy qaǵıdalaryn buzǵany úshin 34 júrgizýshi jaýapkershilikke tartyldy. Sonymen qatar kólik quralyn alkogoldik, esirtki qoldanyp, mas kúıde basqarǵany úshin 22 júrgizýshi ustaldy», – dedi Jambyl oblystyq PD JPQB bastyǵy Rahymberdi Áshkeev.
Sondaı-aq, tıisti ruqsatsyz qaıta jabdyqtalǵan kólik quralyn basqarýdyń 14 deregi, kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzýdyń bes deregi jáne kórineý jalǵan nemese qoldan jasalǵan memlekettik tirkeý nómirlik belgisi bar kólik quralyn basqarýdyń bir deregi anyqtalǵan.