Jambylda bes kúnde 37 qylmys ashyldy
«Bul is-sharanyń maqsaty kósheler men qoǵamdyq oryndarda tıisti quqyqtyq tártip pen qaýipsizdikti qamtamasyz etý, quqyq buzýshylyqtar men qylmystyń aldyn alý, jolyn kesý jáne ashý, sondaı-aq jol qaýipsizdigin qamtamasyz etý», - dedi Jambyl oblysynyń Polıtsııa departamenti Jergilikti polıtsııa qyzmeti basqarmasynyń bastyǵy polıtsııa polkovnıgi Rahymberdi Áshkeev.
Aldyn alý is-sharasyna ishki ister organynyń 650-den astam qyzmetkeri jáne áskerı qyzmetshiler, qoǵamnyń 30 ókili tartyldy jáne 232 birlik avtokólik jumyldyryldy.
Jedel-aldyn alý is-sharasy barysynda 52 qylmys deregi tirkeldi, onyń 37-niń izi sýymaı ashyldy.
«Jedel-aldyn alý is-sharasy barysynda izdeýde júrgen jeti adam ustaldy, jalpy salmaǵy 7 keli 659 gr marıhýanany zańsyz aınalymǵa salýdyń segiz deregi anyqtaldy. Tegis uńǵyly atys qarýyn alyp júrýdiń nemese saqtaýdyń 1 deregi jáne sýyq qarýdy alyp júrýdiń 2 deregi (ańshylyq pyshaq jáne qolóner kasteti) anyqtaldy»,- delingen vedomstvo habarlamasynda.
Budan basqa, 2557 ákimshilik quqyq buzýshylyq deregi tirkelgen.
Sondaı-aq, kóshi-qon zańnamasy jelisi boıynsha Qazaqstan Respýblıkasy Ákimshilik quqyq buzýshylyq týraly kodeksiniń 518-baby boıynsha (QR Halyqtyń kóshi-qony salasyndaǵy zańnamasyn buzý) TMD azamattarynyń 62 ákimshilik quqyq buzýshylyq deregi anyqtaldy. Qabyldaý-taratý ornyna 40 adam, Jambyl oblystyq psıhıkalyq densaýlyq ortalyǵyna 105 adam ornalastyryldy.