Jambylda balyq ósirýshilerge 12 mln teńgege deıin nesıe berilýi múmkin
Bul bastama jeke kásipkerlerdiń de kóńilinen shyqty.
Basqosý barysynda oblys ákimdiginiń tabıǵı resýrstar jáne tabıǵatty paıdalanýdy retteý basqarmasynyń basshysy Nurjan Nurjigitov óńirdegi 115 iri sý aıdynyna teskerý júrgizilgenin jetkizdi. Sonyń nátıjesinde 103 sý aıdyny bolashaǵy bar ári balyq ósirýge qolaıly dep qorytyndy shyǵarylǵan.
Aıta keteıik, jıynǵa 20-dan astam kól paıdalanýshylar qatysty. Olar Asqar Isabekulyna ózderiniń jumys barysy, ıelikterindegi sý aıdyndarynyń hal-ahýaly jaıly aıtyp berdi. Óńir basshysy aldaǵy ýaqytta olarmen jańa tártip boıynsha, kelisim-shart negizinde jumys júrgiziletinin jetkizdi. Osylaısha sý aıdyndaryna túrli joldarmen ıelik etip kelgen, biraq búginde balyq ósirýmen aınalyspaıtyn azamattardy anyqtap, retke keltirý sharalary qolǵa alynbaq. Bul oraıda ózen-kólderdegi jaǵdaıdy, onda jiberiletin balyqtardyń tuqymyna deıin atalmysh basqarma baqylap otyrady.
Jambyl oblysynda jyl saıyn shamamen 3880 tonna balyq tutynylatyn bolsa, sonyń 2465 tonnasy basqa oblystardan ımporttalady. Asqar Isabekuly osy jaıtqa basa nazar aýdaryp, kún tártibindegi jáne jıynda kóterilgen máseleler boıynsha jaýapty tulǵalarǵa naqty tapsyrmalar berdi.
Eske sala ketsek, Qazaqstan Respýblıkasy Prezıdenti Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda Úkimetke bıznesti órkendetýdiń turaqty kózderin qalyptastyryp, jeke ınvestıtsııany yntalandyrý jáne naryq erkindigin qoldaý týraly tapsyrma bergen bolatyn. Memleket basshysy osy arqyly jańa jumys oryndaryn ashyp, halyqtyń basym bóligin tabys kózimen qamtamasyz etýge bolatynyn atap kórsetti. Osy oraıda el ekonomıkasy men adamdardyń turmys sapasyn arttyryp, bıznestiń turaqty kózi sanalatyn salanyń biri - balyq sharýashylyǵy ekeni de daýsyz.
Avtor: Ǵıbrat Sembaı
