Jambylda balalar arasyndaǵy sýıtsıd 3 ese kóbeıgen
TARAZ. QazAqparat - Oblysta jasóspirimder qylmysy - 25,7%, balalarǵa qatysty qylmystar - 29,1%, al sýıtsıd - 3 esege kóbeıdi, dep habarlaıdy QazAqparat oblystyq prokýratýranyń baspasóz qyzmetine silteme jasap.
Búgin ótken úılestirý keńesiniń otyrysynda osy keleńsiz statıstıka aıtyldy.
Oblysta kámeletke tolmaǵandar isteri jónindegi 12 oblystyq, qalalyq jáne aýdandyq komıssııa jumys isteıdi, onda 250-den astam másele qaralyp, 1759 túrli aldyn alý is-sharasy ótkizildi. Alaıda, bir de bireýinde quqyq buzýshylyq jasaýǵa yqpal etetin sebepter qaralǵan joq.
Álsiz profılaktıkanyń ekinshi sebebi - ıývenaldyq polıtsııa kadrlarynyń tájirıbesizdigi. 202 qyzmetkerdiń 60%-nyń ǵana bir jyldyq jumys ótili bar, tek 114-i ǵana joǵary zańgerlik bilim alǵan.
Úshinshi sebep - júrgizilip jatqan profılaktıkalyq sharalardyń ózgermeýi.
Sondyqtan, Úılestirý keńesiniń otyrysynda atalmysh úrdisti jaqsartý úshin birqatar is-sharalar josparlandy. Birinshiden, ómirde qıyn jaǵdaıǵa tap bolǵan balalardy anyqtaý jáne áleýmettik ońaltý jumysyn kúsheıtý. Ekinshiden, mektep psıhologtary men kámeletke tolmaǵandar isi jónindegi ınspektorlardyń jumys formatyn qaıta qaraý. Sondaı-aq, mektep psıhologtary men ınspektorlarynyń jumysy úshin mektepterdiń oqý josparyna jeke ýaqytty engizip, esepte turǵan balalar jeke toptarǵa bólinedi.
