Jambylda balabaqsha kezegindegi 3-6 jasar balalar sany 7 myńǵa azaıdy
Osy arqyly balabaqsha kezegindegi 3-6 jasar balalar sany ótken jylmen salystyrǵanda 7 myńǵa kemip, 1873-ti qurap otyr.
Búgingi tańda oblystaǵy 508 mektepke deıingi bilim mekemesinde 53 myńnan astam bala tárbıelenýde. Onyń 358-i - balabaqsha, 150-i - shaǵyn ortalyq. Mektepke deıingi bilim berý uıymdarynyń 26,2 paıyzy (133 uıym) - jekemenshik. Bul týraly «Mektepke deıingi bilim berý sapasyn arttyrý» atty oblystyq konferentsııada jan-jaqty aıtyldy. Shara barysynda «Balabaqsha - dástúrler men ınnovatsııalardyń bastaýy» taqyrybynda kórme uıymdastyryldy.
Elbasy N. Nazarbaev 5 qazandaǵy Qazaqstan halqyna arnaǵan Joldaýynda mektepke deıingi bilim berý sapasyn túbegeıli jaqsartý máselesin aıryqsha atap ótkeni belgili. Bul maqsatta arnaıy Jol kartasynyń jobasy ázirlenip, Bilim jáne ǵylym mınıstrligi tarapynan talqylanýda. Atalǵan jıynda sóz alǵandar osy oraıdaǵy oramdy oılaryn ortaǵa saldy.
«Jol kartasy aıasynda mektepke deıingi bilim uıymdaryndaǵy pedagog qyzmetkerlerdiń biliktiligin kóterý, tárbıeshilerdiń jalaqysyn kóbeıtý josparlanǵan. Pedagogtardyń kásibı ósýi men ádistemelik daıyndyǵy - búgingi tańdaǵy asa ózekti másele bolyp otyr. Óıtkeni, bilim berý júıesinde ınnovatsııalyq ózgerister óte kóp. Óńirde 6 myńnan astam balabaqsha pedagogtary bar. Onyń 46,5 paıyzynyń «Mektepke deıingi tárbıe men oqytý» mamandyǵy boıynsha joǵary jáne arnaıy orta bilimi bar. Bul kórsetkish respýblıkada 45,8 paıyzdy quraıdy. Elbasy Joldaýynda mektepke deıingi uıymdardaǵy balalardyń ómir qaýipsizdigin saqtaý máselesi de kóterildi. Qazirgi ýaqytta oblystaǵy balabaqshalardyń 99,7% beınekameramen jabdyqtalǵan», - dedi Jambyl oblysy ákimdiginiń bilim basqarmasynyń bólim basshysy Saıasat Eseev.
Saıasat Kerimbekulynyń sózinshe, mektepke deıingi tárbıemen qamtylǵan 3-6 jastaǵy balalardyń úlesi ótken jylmen salystyrǵanda 90,2 paıyzdan 97,1 paıyzǵa ósken. Jyl sońyna deıin ony 98 paıyzǵa jetkizý kózdelip otyr. Bul kórsetkish respýblıkada - 95,2 paıyz.
Aıta ketý kerek, keler jyly 29 balabaqsha ashyp, 3-6 jastaǵy balalardy mektepke deıingi tárbıemen 100 paıyz qamtý kózdelip otyr.
Ǵıbrat Sembaı
