Jambylda bala urlyǵy týraly jalǵan habar taratqan áıel jurttan keshirim surady
TARAZ. QazAqparat –Jambylda bala urlyǵy týraly jalǵan aqparat taratqan 54 jastaǵy áıel kópshilikten keshirim surap, óz isine ókinetinin aıty,-dep habarlaıdy QazAqparat.
Aıta keteıik, osydan eki-úsh kún buryn «WhatsApp» messendjerinde áıel adam Baızaq aýdany Sarykemer aýylynda belgisiz adamdardyń jas balany urlaýǵa áreket jasaǵany týraly habarlama taratqan bolatyn. Atalǵan aqparat kópshiliktiń kóńiline úreı uıalatyp, qorqynysh týdyrǵan edi.
Alaıda oblystyq polıtsııa departamenti ondaı oqıǵa tirkelmegenin, habarlamanyń jalǵan derekke qurylǵanyn jetkizdi.
«Habarlama taraǵan kúni polıtsııa qyzmetkerleri jedel-izdestirý is-sharalaryn júrgizý nátıjesinde aýdıojazbany taratqan Baızaq aýdany Sarykemer aýylynyń turǵynyn anyqtady. Shyndyqqa janaspaıtyn aqparat taratqan 54 jastaǵy áıel óz áreketi úshin turǵyndardan keshirim surady»,-delingen vedomstvo málimdemesinde.
Sondaı-aq, oblystyq Polıtsııa departamenti kórineý jalǵan aqparat taratýdyń qylmystyq jaýapkershilikke ákep soǵatynyn eskertedi.
