Jambylda baqylaý kameralary arqyly kúnine 50-den astam buzýshylyq anyqtalady
TARAZ. QazAqparat – Jambyl oblysynda syrtqy baqylaý kameralarynyń kómegimen kúnine 50-den astam ákimshilik tártip buzýshylyq anyqtalady, dep habarlaıdy QazAqparat tilshisi.
Jambyldyq polıtseıler syrtqy baqylaý kameralarynyń kómegimen kúnine 50-den astam ákimshilik buzýshylyqty anyqtaıdy. Bul óz kezeginde tártip saqshylarynyń jumysyna aıtarlyqtaı oń yqpal etýde.
Aıtalyq, Taraz qalasynyń Polıtsııa basqarmasy jedel basqarý ortalyǵynyń syrtqy baqylaý kameralarymen Seıfýllın kóshesinde «BMV» markaly avtokólik júrgizýshisiniń joldyń qarsy jolaǵyna shyǵyp, baǵdarshamnyń tyıym salynǵan belgisinen ótip, jol qozǵalysy erejelerin buzǵan eki deregi tirkeldi. Júrgizýshige qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 596-baby 5-bólimi jáne 599-baby 1-bólimi boıynsha eki ákimshilik hattama toltyryldy. Avtokólik aıyp turaǵyna qoıyldy.
Sondaı-aq, bes júrgizýshi avtomobıl áınegine jabyndar nemese plenkalar salǵany úshin Qazaqstan Respýblıkasynyń Ákimshilik quqyq buzýshylyq týraly kodeksiniń 590-baby 5-bóligi boıynsha ákimshilik jaýapkershilikke tartylǵan. Bul týraly oblystyq polıtsııa departamentiniń baspasóz qyzmeti habarlady.
«Taraz qalasynyń Seıfýllın kóshesindegi baǵdarshamnyń tyıym salynǵan belgisinen ótken «VAZ» markaly avtokólik júrgizýshisine ákimshilik hattama toltyryldy. Sonymen qatar, «Avtoýragan» apparattyq-baǵdarlamalyq kesheniniń jáne syrtqy baqylaý kameralarynyń kómegimen Qonaev kóshesinde kórineý jalǵan nemese qoldan jasalǵan memlekettik tirkeý nómirlik belgisi bar «Lada Largýs» markaly avtokóliginiń qozǵalysy anyqtaldy. Júrgizýshige qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 590-baby 3-bóligi boıynsha ákimshilik hattama jasalyndy. Ol on bes aılyq eseptik kórsetkish mólsherinde aıyppul tóleıdi» delingen vedomstvo habarlamasynda.
