Jambylda baǵaly nómirlerdi satyp alýshylar bıýdjetke 58 mıllıon teńge túsirgen
TARAZ. QazAqparat – Jambyl oblysynda joǵary suranystaǵy nómirlerdi satyp alýshylar bıýdjetke 58 mıllıon teńge túsirdi,- dep habarlaıdy QazAqparat tilshisi.
Jambyl oblysy polıtsııa departamentiniń ákimshilik polıtsııa basqarmasynyń bastyǵy polıtsııa polkovnıgi Mambet Smaılovtyń aıtýynsha, aǵymdaǵy jyldyń basynan kólik quraldaryn tirkeý jáne esepten alý boıynsha – 42082 memlekettik qyzmet kórsetilgen. Onyń ishinde 10104 júrgizýshi kýáligi berilgen desek, 2149 adam ony jańadan alǵan.
Sondaı-aq, «www.egov.kz» elektrondyq úkimet portaly arqyly 3870 kólik quraly tirkelip, 2420 júrgizýshige kýálik berilgen.
Sonymen qatar, 400-den astam kólik quraldary úshin memlekettik tirkeý nómiri belgisiniń tólnusqasy berilgen. Sebebi, onyń ishinde túsip qalǵandary jáne jol-kólik oqıǵasynan jaramsyz bolyp qalǵandary kezdesedi.
«Joǵary suranystaǵy nómirlerdiń 218 danasy jalpy somasy 58 mıllıon 415 myń teńgege satyldy desek, onyń ishinde jıi kezdesetin 010-nan 090 deıin jáne 077, 707 memlekettik tirkeý nómirlik belgileriniń 96 danasy ótkerilgen»,-deıdi M.Smaılov.
Aıta keteıik, ákimshilik polıtsııa bólimsheleri jol qaýipsizdigin qamtamasyz etý baǵytynda 3 túrli memlekettik qyzmet kórsetedi. Olar: memlekettik tirkeý jáne keıbir kólik quraldaryn kólik quralynyń teńestirý nómiri boıynsha esebi, kólik quraldary úshin memlekettik tirkeý nómiri belgisiniń telnusqasyn berý, júrgizýshi kýáligin berý.
