Jambylda áıel ajyrasqan soń artynan barǵan jasaýyn sot arqyly qaıtaryp aldy
TARAZ. QazAqparat - Turar Rysqulov aýdanynyń turǵyny sotqa qyz jasaýyndaǵy múlkin qaıtaryp alý talabymen júgingen, dep habarlaıdy QazAqparat.
2021 jyldyń maýsym aıynda talap qoıýshy jaýapkermen musylmandyq nekege turǵan.
Toıdan keıin qalyńdyqtyń týystary dástúr boıynsha qyz jasaýyn syılaǵan.
Alaıda otbasyndaǵy túsinispeýshiliktiń saldarynan erli-zaıyptylar ajyrasqan.
Kúıeý jigittiń týystary qyz jasaýyn qaıtarýdan bas tartqannan keıin áıel atalǵan múlikti qaıtaryp alý úshin sotqa júgingen.
«Іsti qaraý barysynda taraptar sot medıatsııasy jolymen daýdy bitimgerlikpen sheshý jóninde kelisim jasady. Onyń shartyna sáıkes, jaýapker 14 sáýirge deıin talap qoıýshyǵa tizimge sáıkes qyz jasaýyn óz erkimen qaıtarýǵa mindettendi. Al talap qoıýshy belgilengen merzimde múlikti tıep, áketýge tıis» dep habarlady Rysqulov aýdandyq sotynyń baspasóz qyzmeti.
Sot eki tarapqa medıatıvtik kelisimdi bekitý men isti toqtatý saldaryn túsindirdi.
Medıatıv kelisim týraly sot uıǵarymy zańdy kúshine endi.
