Jambylda avtobýs júrgizýshileri 2 myń márte jol erejesin buzǵan
TARAZ. QazAqparat – Jambyl oblysynda jyl basynan beri qoǵamdyq kólik júrgizýshileriniń qatysýymen 2 myńnan asa jol erejesi buzylǵan,- dep habarlaıdy QazAqparat tilshisi.
2020 jyldyń 10 aıynda Jambyl oblysy PD JPQB jol qozǵalysyn qadaǵalaý bólimi oblystyń avtomobıl joldarynda jolaýshylar tasymalyn, sondaı-aq jalpy jol qozǵalysy qaýipsizdigin baqylaý boıynsha jumystyń tıimdiligin arttyrýǵa baǵyttalǵan birqatar is-shara ótkizgen.
Aldyn alý is-sharalarynyń basty maqsaty - qoǵamdyq kóliktiń qatysýymen bolatyn jol-kólik oqıǵalarynyń sanyn azaıtý jáne jolaýshylardyń qaýipsizdigin qamtamasyz etý.
Esepti kezeńde oblys boıynsha qoǵamdyq kólik júrgizýshileri tarapynan jol qozǵalysy erejelerin buzýdyń 2 myńnan astam jaǵdaıy anyqtalǵan.
Polıtseılerdiń osy baǵyttaǵy jumysy avtobýstardyń tehnıkalyq jaı-kúıin, olardyń jol júrisi qaýipsizdigin qamtamasyz etýdiń belgilengen talaptaryna sáıkestigin tekserý, júrgizýshilerde tirkeý qujattarynyń bolýy, normatıvter men standarttar talaptaryn buza otyryp avtobýstardy paıdalaný faktilerin anyqtaý, kólik quraldaryn zańsyz qaıta jabdyqtaý jáne basqa da sharalardy barlaýǵa negizdelgen.
- Oblysta memlekettik nemese mindetti tehnıkalyq baqylaýdan ótpegen 83 avtobýs anyqtaldy, 31 júrgizýshi jumys pen demalys rejımin buza otyryp, qoǵamdyq kólikti basqarǵany belgili boldy. Avtobýs parkteriniń 25 laýazymdy tulǵasy ákimshilik jaýapkershilikke tartyldy, paıdalanýǵa tyıym salynýyna baılanysty 32 avtobýs aıyppul turaǵyna qoıyldy. Ruqsat etilmegen 2 avtoturaq jabyldy. Sonymen qatar, 401 avtobýs júrgizýshisi belgilengen jyldamdyqty asyrǵany úshin, 437 júrgizishi kólik quralyn basqarý kezinde telefon paıdalanǵany úshin, 370 júrgizýshi manevr jasaý erejelerin buzǵany úshin, 52 júrgizýshi lastaýshy zattardyń shyǵaryndylarynyń normatıvin asyrǵany úshin jáne taǵy basqa da tıisti talaptardy buzǵandar ákimshilik jaýapkershilikke tartyldy, - dep atap ótti Jambyl oblysy PD JPQB ÓQQB arnaıy tapsyrmalar jónindegi aǵa ınspektory Bolat Іzbasarov.
