Jambylda aýyr qylmysty ashýǵa úles qosqan 5-synyp oqýshysy marapatqa usynyldy
TARAZ. QazAqparat - Buǵan deıin habarlaǵanymyzdaı Jambyl oblysynda 8 jasar qyz joǵalyp ketip, óli denesi tabylǵan bolatyn. Atalǵan asa aýyr qylmysty ashýda ózindik úlesin qosqan Qarataý qalasynyń turǵynyn jáne Rasýl esimdi besinshi synyp oqýshysyn marapattaý úshin oblystyq polıtsııa departamenti Іshki ister mınıstri Erlan Turǵymbaev myrzaǵa usynys bildirdi, dep habarlaıdy QazAqparat tilshisi.
Bul týraly oblystyq polıtsııa departamentiniń basshysy Arman Orazalıevtyń qatysýymen ótken baspasóz máslıhatynda aıtyldy. Departament basshysy joǵalǵan qyzdy izdeý kezinde belsendilik tanytqan barlyq azamattarǵa, sonyń ishinde balalarǵa, Arýaıdyń synyptastaryna alǵys bildiretinin jetkizdi.
Aıta keteıik, 2019 jyldyń 24 sáýirinde Jambyl oblysy Talas aýdany Qarataý qalasynyń kámelettik jasqa tolmaǵan turǵyny joǵalyp ketken bolatyn. Aǵymdaǵy jyldyń 25 sáýiri kúni qalanyń syrtynan joǵalǵan qyzdyń máıiti tabylyp, Polıtsııa departamentimen qylmystyq is «kámeletke tolmaǵandy óltirý» babyna aýystyryldy.
27 sáýirde polıtsııa qyzmetkerleri jedel-izdestirý is-sharalarynyń nátıjesinde Qarataý qalasynda bolǵan jas balany óltirý deregine qatysy bar degen kúdikpen 37 jastaǵy jergilikti turǵyndy ustady. Ol kúdikti retinde tanylyp, Talas aýdandyq polıtsııa bóliminiń ýaqytsha ustaý ızolıatoryna qamaqqa alyndy.
«Kúdiktiniń qylmystyq is-áreketteri Qylmystyq kodekstiń 99-baby, 2-bóligi, 3 jáne 14-tarmaǵymen saralandy. 28 sáýirde oǵan qatysty «qamaqta ustaý» bultartpaý sharasy qoldanyldy. Qazirgi tańda, barlyq saraptamalar taǵaıyndalyp, jan-jaqty tergep-tekserý amaldary júrzilýde»,- deıdi A.Orazalıev.
