Jambylda aýyldyq okrýgterde 146 aqparattyq ortalyq ashyldy
Bul týraly oblystyq Mádenıet, arhıvter jáne qujattama basqarmasynyń esepti jıynynda jan-jaqty aıtyldy. Oblys ákimi Asqar Myrzahmetovke atalmysh basqarma basshysy Dúısenáli Byqybaev saladaǵy jumystar men ózekti máseleler týraly baıandady.
Onyń aıtýynsha, tsıfrlandyrylǵan aqparattyq ortalyqtyń 21-i kovorkıng ortalyǵy. Búginde ol ortalyqtar arqyly aýyl turǵyndary cao-zhambyl.kz/ saıty jáne egov.kz portalyndaǵy qyzmet túrleri arqyly qajetti aqparattaryn alyp otyr.
«Bıylǵy jyldyń toǵyz aıynda 76 tsıfrlandyrylǵan aqparattyq ortalyq ashylyp, jospar artyǵymen oryndalsa, jyl sońyna deıin taǵy 25 okrýgte osyndaı aqparattyq ortalyqtar paıdalanýǵa berilmek. Aıta keteıik, esepti merzimde atalǵan ortalyqtarmen aýyldyqtarǵa 13329 anyqtama berilip, saıt arqyly 4 826-nan asa suranys qanaǵattandyryldy», - dedi Dúısenáli Byqybaev.
Basqarma basshysy eldi mekenderdi mádenıet nysandarymen qamtý jáne olardyń halyqqa qyzmet kórsetý deńgeıin arttyrý kartasyna sáıkes 2019-2021 jyldary 26 eldi mekende aýyldyq klýb ǵımarattaryn salý josparlanyp otyrǵanyn jetkizdi. Sonymen qatar, «Tsıfrly Qazaqstan» memlekettik baǵdarlamasyn iske asyrý maqsatynda Jambyl oblystyq memlekettik arhıvine «Elektrondyq arhıv» aqparattyq júıesi baǵdarlamasyna jergilikti bıýdjetten 15 mıllıon teńge bólingen.
Jıynda kitaphanalar, teatr men mýzeılerdiń jumystaryn jandandyrý máseleleri kóterilip, kórsetkishter negizge alyndy.
Asqar Myrzahmetov óńirdegi kitaphanalar jumysyn ońtaılandyrýdy, óner ujymdarynyń aýyldyq mekenderge gastroldik saparlaryn júıeli túrde uıymdastyrýdy, teatr qoıylymdaryn áleýmettik jeliler arqyly tarata otyryp, kórermenniń qyzyǵýshylyǵyn arttyrýdy tapsyrdy.