Jambylda aýyldardan bes shaqyrym radıýsta ornalasqan jaıylymdyq jerler memleket menshigine qaıtarylýy múmkin

TARAZ. QazAqparat - Jambyl oblysynda jerdi tıimdi paıdalaný bes baǵyt boıynsha júzege asyrylyp jatyr, dep habarlaıdy QazAqparat tilshisi.

Aımaqtaǵy ákimdiktiń jer qatynastary basqarmasynyń basshysy Baqtııar Kópbosynovtyń aıtýynsha, eń aldymen eldi mekenderden tys ornalasqan mal jaıý jerlerin aýyldyq okrýgterge bekitý qajet. Jambyl oblysynda jyl sońyna deıin aýyldyq okrýgterge 106,9 myń gektar jer beriledi. Búgingi tańda tek Jambyl aýdanynda 706 gektar jer berildi.

«Sodan soń aýyldardan bes shaqyrym radıýsta ornalasqan jaıylymdyq jerlerdi memlekettiń menshigine qaıtarý kerek. Jospar boıynsha – 165,6 myń gektar bolsa, 6 aıdyń qorytyndysymen 5 myń gektar qaıtaryldy. Úshinshi, orman qorynda ornalasqan jaıylymdardy da paıdalaný ózekti. Ázirge tek 132 adam 112,1 myń gektar jerdi ıelendi», - dedi basqarma basshysy.

Ol tórtinshi baǵyt retinde jer paıdalanýshylarmen memorandýmǵa qol qoıý máselesin atady. Soǵan sáıkes, olar mal jaıýǵa kedergi jasamaýǵa mindetteledi. Búgingi tańda 2071 turǵynmen 487 myń gektar jerdi paıdalaný týraly kelisimge qol jetkizildi.

«Al besinshi baǵyt - paıdalanylmaıtyn aýyl sharýashylyǵy jerlerin aınalymǵa qaıtarý. Jalpy, 145,9 myń gektar jerdi memlekettik menshikke qaıtarý josparlanýda, 6 aı ishinde 52,6 myń gektar qaıtaryldy», - dedi B.Kópbosynov.