Jambylda aýyl moldasy kórshisin pyshaqtap óltirip, ózi asylyp qalǵan
TARAZ. QazAqparat – Jambyl oblysy Jambyl aýdanynda aýyl moldasy óziniń kórshisin pyshaqtap, artynan ózi de asylyp qaldy, dep habarlaıdy QazAqparat tilshisi.
Qandy oqıǵa atalǵan aýdanǵa qarasty Besaǵash aýylynda bolǵan. Marqum bolǵan 51 jastaǵy molda Musa Súleımenov atalǵan aýylda 15 jyldan beri meshit ımamy bolyp kelgen. Resmı málimetke súıensek, ol kórshisi Qanat Dónenbaevqa as úı pyshaǵymen jaraqat salǵan.
Qorada oryn alǵan qaqtyǵys turmystyq kıkiljińnen bastalǵan desedi. Q.Dónenbaev aýyr jaraqattan sol jerde qaza tapsa, sol kúni M.Súleımenov óz-ózine qol jumsaǵan. Ol aýyldaǵy № 8 úıdiń janynda aǵashqa asylyp turǵan kúıinde tabylǵan. Bul týraly oblystyq polıtsııa departamentinen habarlady.
«Atalǵan derek boıynsha QR QK 99-babynyń 1-bóligimen jáne óz-ózine qol jumsaýyna qatysty 105-baby, 1-bóligimen qylmystyq is qozǵaldy», - dedi Jambyl aýdandyq polıtsııa bólimi bastyǵynyń orynbasary Dáýletjan Bektenbaev.
Al, oblys ákimdiginiń Din isteri basqarmasy, oblystyń bas ımamy da bul oqıǵanyń turmystyq máseleden týǵan janjal ekenin rastap otyr.
