Jambylda «Aýyl – el besigi» baǵdarlamasy aıasynda shyǵarmashylyq ortalyq ashyldy
TARAZ. QazAqparat – Jambyl oblysy Asa aýylynda «Aýyl – el besigi» baǵdaralmasy aıasynda shyǵarmashylyq ortalyq ashyldy,-dep habarlaıdy QazAqparat tilshisi.
Oblys ortalyǵymen irgeles jatqan Jambyl aýdany Asa aýylynda «Tehnıkalyq shyǵarmashylyq jáne kásibı baǵdar berý ortalyǵy» ashyldy.
Óskeleń urpaqtyń ón boıyndaǵy qabiletti anyqtap qana qoımaı, damytyp, shyǵarmashylyǵyn shyńdap, bolashaq mamandyǵynyń baspaldaǵyn qalyptastyratyn ortalyqtyń ashylý saltanatyna oblys ákiminiń orynbasary Erjan Jylqybaev arnaıy qatysyp, ónerli órenderdiń qýanyshymen bólisti.
«Tárbıe – tal besikten» demekshi, aýdan ákimdigi bilim bólimine qarasty ortalyq qazirgi zaman talaptaryn barynsha eskere otyryp, el erteńine, óskeleń urpaqtyń ıgiligine berilip otyr. Sebebi mamandyq tańdaý isi retke kelmeı maman tapshylyǵy máselesi de sheshimin tappasy anyq. Osy rette oblys ákiminiń orynbasary Erjan Jylqybaev ortalyqtyń jumysymen jan-jaqty tanysyp, oqytýshylardyń eńbegine sáttilik tiledi.
Aıta ketsek, 1961 jyly tıptik jobada salynǵan ǵımaratqa «Aýyl – el besigi» baǵdarlamasy aıasynda respýblıkalyq bıýdjet esebinen jańǵyrtý jumystary júrgizilip, úsh qabatty nysan adam tanymastaı ózgergen.
«Ortalyqta oqýshylardyń fýnktsıonaldyq saýattylyǵyn arttyrý maqsatynda 6 baǵyt boıynsha 16 úıirme jumys atqarady. Munda robototehnıka, keme úlgileý, avıa úlgileý, etnodızaın, tigin, tamaq óneri men qazaq jáne aǵylshyn tili, sóıleý sheberligi, sýret, hımııa, mentaldi matematıka, avtokólik isi men medıtsınalyq alǵashqy kómek kórsetý úıirmeleri boıynsha oqýshylar ózderiniń bilimderin tereńdete túsedi. Bul úıirmelerde jalpy sany 1400 bala qamtylady», – deıdi bala tárbıeleý isinde otyz jylǵa jýyq tájirıbesi bar ortalyq dırektory Saltanat Kurmanova.
Jalpy aıtqanda ortalyqta tehnıkalyq baǵyt boıynsha 515 oqýshy, kórkem estetıkalyq baǵyt boıynsha 300 oqýshy, tildik baǵytta 150 oqýshy, bıologııalyq ekologııalyq baǵytta 150 oqýshy, sándik qoldanbaly baǵytta 120 oqýshy, kásiptik baǵdar berý baǵyty boıynsha 150 oqýshy qamtylady dep josparlanǵan.
