Jambylda «Aýyl – el besigi» baǵdarlamasy aıasynda 110 joba júzege asýda
TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken apparattyq keńeste «Aýyl - El besigi», «Dıplommen - aýylǵa», «Eńbek» baǵdarlamalarynyń oryndalý barysy qaraldy, dep habarlaıdy QazAqparat tilshisi.
Apparattyq keńes ádettegideı jáne oblys ákimdiginiń resmı saıtynda jáne «YouTube» arnasynda onlaın rejıminde taratyldy. Ekonomıka jáne bıýdjettik josparlaý basqarmasynyń basshysy Gúldana Jaýynbekova habarlaǵandaı, 2019 jyly Baızaq, Jambyl, Shý aýdandarynda «Aýyl - El besigi» aıasynda 108 joba iske asyrylǵan. «Úsh aýdanda 24 áleýmettik nysan, 55 kóshe, eki sý qubyry jóndeýden ótti, 23 kóshe jaryqtandyryldy, tórt áleýmettik nysannyń qurylysy júrgizildi», - dedi G.Jaýynbekova.
Aǵymdaǵy jyly 29 eldi mekende jalpy somasy 7,4 mlrd.teńgege 110 jobany júzege asyrý josparlanǵan. Aýyldarda 15 áleýmettik nysan salynyp, 11 bilim berý jáne sport mekemeleri, 84 kóshe jóndeýden ótýde. 54 turaqty jáne 1110 ýaqytsha jumys oryndary
quryldy. «Aýyl - El besigi» baǵdarlamasy boıynsha bólingen qarajat Baızaq jáne Merki aýdandarynda tolyq ıgerilmegen.
«Aqsha birneshe aı buryn bólinse de áli tolyq ıgerilmegen. Oń nátıjege qalaı qol jetkizesizder? «Aýyl – El besigi» baǵdarlamasyn júzege asyrý Elbasy Nursultan Nazarbaevtyń tapsyrmasyna sáıkes bastalǵan bolatyn. Negizgi maqsat – aýyl turǵyndarynyń ómir súrý sapasyn jaqsartý, aýyldyq jerlerdiń ınfraqurylymyn jańǵyrtý.
Baǵdarlamanyń jemisti júzege asýy aýdan ákimderiniń óz mindetterine degen jaýapkershilikpen qaraýyna baılanysty», - dep atap ótti ol.
Ol tıisti qarjyny durys bólýdi jáne baqylaýdy tapsyrdy.
«Bir aýylda alty mıllıonnan astam teńgege kóshe jóndelse, al kórshi aýylda dál sondaı kósheni jóndeýge on mıllıon teńge bólingen.
Keıde bul kósheler altynnan jasalyp jatyr ma dep oılaısyń? Shý aýdanynyń Birlik aýylynda uzyndyǵy 4,7 shaqyrym bolatyn bir kóshege 100 mıllıon teńge, Alǵa aýylynda uzyndyǵy 3,7 shaqyrym bolatyn kóshege 80 mıllıon teńge jumsalǵan. Nege muny eshkim qadaǵalamaıdy?
Sport nysandary da bir jerde qymbat, bir jerde arzanǵa salynýda.
Aýyldarda qandaı áleýmettik nysandar jetispeıtinin zerdeleý kerek, bárin sala berýdiń qajeti joq. Máselen, bir aýdannyń aýylynda úsh úlken sport kesheni bar, al basqa aýylda birde-bir Mádenıet úıi joq. Turǵyndardyń sany da eskerilýi kerek. Jýaly aýdanynyń Nurlykent aýylynda tórt myńǵa jýyq turǵynnyń turatynyna qaramastan 90 adamǵa arnalǵan mádenı nysan salmaq bolǵan. Bıýdjet qarajatyn tıimsiz paıdalanýdyń mundaı
mysaldaryna jol berilmeýi tıis», - dedi Berdibek Saparbaev.
Sondaı-aq, aımaq basshysy jobalardy júzege asyrýǵa bıýdjetten tys qarajat tartýdy tapsyrdy.
Jıynda «Dıplommen – aýylǵa!», «Eńbek» nátıjeli jumyspen qamtýdy jáne jappaı kásipkerlikti damytý baǵdarlamalary aıasynda atqarylyp jatqan jumystar barysy da nazarǵa alyndy.
Aımaq basshysy kórsetkishi tómen aýdan, qala basshylarynyń jaýabyn tyńdap, kórsetkishterdi jyl sońyna deıin jaqsartý jóninde tapsyrmalar júktedi.
«Úsh memlekettik baǵdarlama da óziniń mańyzdylyǵyn kórsetip otyr. Birqatar aýdan ákimderiniń atyna eskertýler aıtyldy. Sizder qalaı jumys isteý kerektigin bilesizder. Jyl qorytyndysy boıynsha barlyq nysanaly ındıkatorlar oryndalýy tıis», - dedi oblys ákimi.
