Jambylda áýesqoılar arasyndaǵy fýtboldan chempıon atanǵan komanda 3 mln teńge ıelendi
TARAZ. QazAqparat – Jambylda áýesqoılar arasynda fýtboldan oblystyq chempıonat ótip, jeńimpaz komanda 3 mıllıon teńgeni ıelendi, dep habarlaıdy QazAqparat tilshisi.
Oblys ákimi Asqar Myrzahmetovtiń bastamasy jáne qoldaýymen fýtboldan áýesqoılar arasyndaǵy oblys chempıonaty máresine jetti. Óńirimde tuńǵysh ret uıymdastyrylǵan chempıonatqa aýdandardan 10 jáne Taraz qalasynan 7 komanda qatysty. Barlyǵy 17 komandada 450 sportshy boldy.
Chempıonat oblysta fýtboldy damytý, áýesqoılar arasynda oblystyń úzdikterin anyqtaý jáne salaýatty ómir saltyn nasıhattaý maqsatyna negizdeldi.
Bes aıdan asa ýaqytqa sozylǵan básekede barlyq komandalar tartysty oıyn kórsetse, jarystyń aqtyq synyna Talas aýdany jáne Qazfosfat komandalary joldama alǵan bolatyn.
«Taraz» ortalyq stadıonynda qos komanda ózara kim myqtyny anyqtady. Eki qarsylas komandalar oıyn barysynda bir-birlerinen osal tustaryn taba almaı, jeńimpaz penaltı arqyly anyqtaldy. Nátıjesinde «Qazfosfat» quramasy basym túsip, jeńimpaz atandy. Jeńimpazdardy marapattaý rásimine aımaq basshysy Asqar Myrzahmetov arnaıy qatysty.
Sonymen, chempıon atanyp, 1-oryndy jeńip alǵan «Qazfosfat» komandasy arnaıy kýbokty qanjyǵalaryna baılap, 3 mıllıon teńgege ıe boldy. Al, ekinshi oryn ıelengen talastyqtar 1,5 mıllıon teńgemen, júldeli úshinshi oryndy jeńip alǵan UQK komandasy 1 mıllıon teńgemen marapattaldy.
Asqar Myrzahmetov jeńimpazdardy quttyqtap, jarysty jylda dástúrli túrde uıymdastyrýdy, keler jyly júlde qoryn eki esege deıin kóterý josparlanyp otyrǵandyǵyn jetkizdi.
