Jambylda alǵash ret asqazan qaterli isigine gastrektomııa operatsııasy jasaldy
TARAZ. QazAqparat – Jambyl oblysynyń onkologııa tarıhynda alǵash ret biregeı ota túri jasaldy,- dep habarlaıdy QazAqparat tilshisi.
Jambyl oblysy Shý aýdandyq aýrýhanasyna aýyr jaǵdaıda kelip túsken 50 jastaǵy turǵynnyń asqazynan qan ketken. Hırýrgııa bólimshesinde oǵan alǵashqy medıtsınalyq kómek kórsetilip, gematransfýzııa dep atalatyn qandy toqtatý ádisi jasalady. Alaıda, odan naýqastyń jaǵdaıy jaqsarmaǵan soń, jedel túrde sanavıtsııa kómegimen Jambyl oblystyq kópbeıindi aýrýhanasynyń onkologııalyq qurylymyna jetkiziledi.
Keshendi tekserý men taldaý-saraptaý nátıjesinde oǵan 3-shi satydaǵy asqazannyń qaterli isigi, asqazannan qan ketý, ekinshi dárejeli qan azdyq dıagnozy qoıyldy. Shuǵyl túrde oblystyq kópbeıindi aýrýhanasynyń onkologııa jónindegi orynbasary Gúljan Táıteli, bas dárigerdiń hırýrgııa jónindegi orynbasary Jandos Rysqulov, onkohırýrgııa bóliminiń meńgerýshisi Jandos Seıdahmetov pen jansaqtaý bóliminiń meńgerýshisi Rabıǵa Túsipovanyń qatysýymen konsılıým jasalyp, shuǵyl operatsııa jasaý týraly sheshim qabyldanǵan.
Kóp uzamaı joǵary sanatty, onkolog hırýrgtar Marat Qalıev pen Qaırat Tóleshov laparotomııa arqyly gastrektomııa jasap, qan ketken tamyrdy tigip, qaterli isikti alyp tastady. Oblystyq onkologııalyq dıspanserde mundaı ota alǵash ret jasalyp otyrǵandyqtan, barlyq úrdis bas dáriger Qaırat Jetibaevtyń qatań baqylaýymen júrgizildi. Nátıjesinde ota sátti ótti, naýqastyń jaǵdaıy jaqsara tústi.
«Gastrektomııa – bul hırýrgııalyq protsedýra, ony jasaý barysynda asqazannyń bir bóligin alyp tastaıdy. Gastrektomııanyń birneshe túrleri bar, olar protsedýra kezinde asqazan men onyń aınalasyndaǵy tinderdiń qansha mólsheriniń joıylatyndyǵyna baılanysty bolady. Negizi bul ádis-tásil – úlken daıyndyqpen jasalatyn josparly hıýrgııalyq ádis. Al bul jaǵdaıda, patsıenttiń ómirine tóngen qaýiptiń joǵary bolýyna baılanysty shuǵyl túrde, ýaqyt joǵaltpaı ota jasalady. Sondaı-aq, operatsııanyń bul túri joǵary tehnologııaly, óte kúrdeli bolyp sanalady jáne ol mindetti áleýmettik medıtsınalyq saqtandyrý qory esebinen tegin júrgiziledi»,-delingen oblystyq densaýlyq saqtaý basqarmasy baspasóz qyzmetiniń habarlamasynda.
