Jambylda áleýmettik sala boıynsha 32 nysan salynyp jatyr - Asqar Myrzahmetov
TARAZ QazAqparat - Búgin Jambyl oblysynyń ákimi Asqar Myrzahmetov oblystyq máslıhat depýtattarynyń aldynda esep berdi, dep habarlaıdy QazAqparat oblys ákiminiń baspasóz qyzmetine silteme jasap.
Basqosýda aımaqta jyl basynan beri atqarylǵan jumystardyń barysy baıandaldy. Jalpy, oblystyń alty aıdaǵy áleýmettik-ekonomıkalyq kórsetkishterinde ósim baıqalady. Jekelegen salalardy damytýdyń naqty jobalary qolǵa alyndy.
Óńirde bıýdjetti maqsatty ıgerge mán berilýde. Bul oraıda, qurylys nysandaryn «Ózektilikke qaraı josparlaý kartasy» ázirlenýde. Sol arqyly bıýdjet qarjysyn 2 ese únemdeýge jol ashyldy.
Jergilikti bıýdjettiń salyq bazasyn keńeıtý maqsatynda basqa óńirlerde tirkelgen 14 jer qoınaýyn paıdalanýshylar oblysta qaıtadan tirkeldi. Nátıjesinde, jergilikti bıýdjetke jylda 150 mln teńgege qosymsha túsimder túsip otyratyn bolady. Sáıkesinshe, kásipkerlerge de qajetti jaǵdaı jasalýda.
«Ekinshi deńgeıdegi bankter arqyly birinshi toqsanda 7,4 mlrd teńgege nesıe berilgen. Bul ótken jyldyń tıisti kezeńimen salystyrǵanda 1 mlrd teńgege artyq. Shaǵyn jáne orta bıznes sýbektilerine memlekettik qoldaýdyń qarjylaı kólemi ótken jylmen salystyrǵanda 2 mlrd 833 mln teńgege artty. Investorlarǵa qyzmet kórsetý ortalyǵynda 116 ınvestıtsııalyq joba daıyndaldy», - dedi oblys ákimi.
Aımaqtaǵy eldi mekenderdi kógildir otynmen qamtý isinde de ilgerileýshilik bar. Bul salada 2019-2022 jyldary jalpy quny 43 mlrd 761 mln teńge quraıtyn 11 joba júzege asyrylmaq.
Óńir ekonomıkasynyń negizi sanalatyn agro salany alǵa jyljytýda egistik alqabyn kóbeıtý jumystary qolǵa alynýda.
«Kezinde oblys aýmaǵyndaǵy egistik alqaby 992 myń ga bolsa, búginde onyń 214 myń ga jer aınalymnan shyǵyp ketken. Osy jerdiń 175 myń gektaryn qaıtarýǵa bolatyny anyqtaldy. Onyń 13 myń gektary bıyl qaıtarýdy josparlap otyrmyz. Sýarmaly jerlerdiń alqabyn kóbeıtý úshin kanaldardy tazartý jáne qalpyna keltirý maqsatynda kommýnaldyq mehanıkalyq otrıad qurylyp, onyń materıaldyq-tehnıkalyq bazasyn qalyptastyrýǵa 693 mln teńge bólindi.Jalpy 3-4 jylda sýarmaly jerlerdiń kólemin 96 myń gektardan 192 myń gektarǵa jetkizý josparlandy», - dedi Asqar Isabekuly.
Máslıhat minberinde jasaǵan baıandamasynda jyl sońyna deıin 15 kóppáterli turǵyn úı paıdalanýǵa beriletindigin atap ótti. Sondaı-aq oblys aýmaǵynda áleýmettik sala boıynsha 32 nysannyń qurylysy júrgizilip jatyr. Taraz qalasynyń sáýlettik kelbetin jaqsartýǵa da kóptep kóńil bólinýde.
Oblystaǵy bilim berý isindegi negizgi kórsetkishter toqtala ketsek. Aımaqtaǵy mektepke deıingi tárbıemen jáne oqytýmen qamtý úlesi 91 paıyzdy quraıdy. Jyl sońyna deıin taǵy da qosymsha 45 mektepke deıingi uıym ashylmaq. Munan bólek, jańa oqý jylynda oblystyq daryndy balalarǵa arnalǵan mamandandyrylǵan ІT lıtseı-ınternaty óz qyzmetin bastaıdy.
Nátıjeli jumystar men oryndy bastamalardy densaýlyq saqtaý, sport, mádenıet salalarynan da anyq ańǵarýǵa bolady. Sáıkesinshe, aǵymdaǵy jyldyń alǵashqy aıyndaǵy jasalǵan jumys oblystyq máslıhat depýtattar tarapynan oń baǵaǵa ıe boldy.
