Jambylda aldaǵy bes jylda 140 mln túp kóshet egiledi
TARAZ. QazAqparat – Jambyl oblysynda aldaǵy bes jyl ishinde 140 mln túp aǵash otyrǵyzylady. Bul týraly búgin ÓKQ alańynda ótken brıfıngide oblystyq tabıǵı resýrstar jáne tabıǵat paıdalanýdy retteý basqarmasynyń basshysy Aslan Orazbekov aıtty, - dep habarlaıdy QazAqparat tilshisi.
Bastama Prezıdent Joldaýynda júktelgendeı «Aǵashtar kólemin arttyrý» baǵyty boıynsha júrgiziletin jumystarǵa jatady.
«Joldaýda aıtylǵan Respýblıka boıynsha otyrǵyzylatyn 2 mlrd aǵashtyń 140 mln túbi bizdiń óńirimizdegi orman qoryna otyrǵyzý josparlanyp otyr. Atalǵan tapsyrmany kezeń-kezeńimen oryndaý úshin arnaıy josparda bekitilgen. Tapsyrmany aldaǵy 5 jylda oryndaý úshin Jambyl oblysy boıynsha keshendi jospar 5 esege kóbeıtilip,orman sharýashylyǵy komıtetimen kelisildi. Otyrǵyzylatyn aǵashtarǵa 79,4 myń ga orman qory jerleri daıyndalýda», — dedi A. Orazbekov.
Budan bólek eldi meken ishinde jáne aınalasyna otyrǵyzýǵa tıesili 970 myń túp aǵashty otyrǵyzýdyń 5 jyldyq jospary da bekitilgen. Bul jumystar basqarmanyń bastamasymen orman, janýarlar dúnıesi, sý qoımalary, jer qoınaýyn paıdalaný jáne ekologııa salalaryn damytýdyń keshendi josparyna engizilgen. Ásirese, orman sharýashylyǵy salasy tóńireginde atqarylǵan jumys kóp.
«Búginde óńirimizdegi orman qorynyń jalpy kólemi 4,4 mln. ga teń. Ótken jylǵa basqarmaǵa qarasty mekemelermen birlesip ormanǵa aǵashtar 3054 gektarǵa, sekseýil tuqymy 2750 gektarǵa otyrǵyzyldy. Sonymen qatar, jospar boıynsha 49 gektarǵa tuqymbaq jasaqtalyp, ártúrli qylqan japyraqty aǵash kóshetteri ósirilýde. Ótken jyldyń kúz aıynda tuqymbaq kólemi 93 gektarǵa ulǵaıtyldy»,-dedi basqarma basshysy.
Brıfıng barysynda ótken jyly óńirde órt kólemi órshigeni jaıly da aıtyldy. Tilsiz jaý tabıǵatqa zııanyn tıgizbeı qoımaǵan. Oblys boıynsha 19 orman órti tirkelip, órtke shaldyqqan aýmaq 41 777 gektardy sharpyǵan. Jalpy shyǵyn 15 mln. 804,1 myń teńgeni quraǵan.
