Jambylda ál-Farabıdiń 1150, Abaıdyń 175 jyldyǵyna oraı onlaın baıqaýlar uıymdastyrylady

TARAZ. QazAqparat – Jambyl oblystyq jastar saıasaty máseleleri basqarmasy elimizdegi tótenshe jaǵdaıǵa baılanysty jastardyń úıde otyrǵan ýaqytyn tıimdi paıdalanýdy uıymdastyrý maqsatynda onlaın jarystar, dárister men basqa da oqytý is-sharalaryn ótkizýdi qolǵa alýda, dep habarlaıdy QazAqparat.

Atalǵan basqarma basshysy Serikbol Berikqojanyń bıyl sáýir aıynda onlaın túrde ótkiziletin is-sharalardyń jospary bekitilgenin jetkizdi.

«Negizgi jospar boıynsha basqarmanyń áleýmettik jelilerdegi resmı paraqshalarynda «Kahoot» ıntelektýaldy oıynynan chempıonat uıymdastyrylmaq. Onda jastarǵa onlaın keńes berý, hakim aqyn Abaı Qunanbaıulynyń 175 jyldyǵyna oraı «Ólmeıtuǵyn sóz qaldyrǵan artynda» atty kórkemsóz oqý sheberleriniń baıqaýy, ál-Farabıdiń 1150 jyldyǵyna oraı «Álemniń ekinshi ustazy» atty posttar baıqaýy syndy sharalar ótedi»,- dedi basqarma basshysy.

Sondaı-aq, qazaq, orys jáne aǵylshyn tilderinen oqytý sabaqtaryn uıymdastyrý, jastarǵa paıdaly taqyryptarda motıvatsııalyq keshter men lektsııalar uıymdastyrý, medıtsınalyq maska tigý, tigin óneri, aǵash, temirden buıymdar jasaý sııaqty jastardy qyzyqtyratyn sharalardy uıymdastyryp, onyń beınejazbasyn ıýtýb arnasyna ornalastyrý jáne oblysqa tanymal jas ónerpazdardyń onlaın-kontsertterin uıymdastyrý sııaqty sharalar ótkizý josparlanǵan.

«Basqarma áleýmettik jelilerdegi paraqshalary arqyly salalyq basqarmalardyń qatysýymen memlekettik qoldaý tetikteri, jumyspen qamtý, kásipkerlik, aýyl sharýashylyǵyn qoldaý, turǵyn úı jáne taǵy da sol sııaqty taqyryptar aıasynda tikeleı efır arqyly onlaın keńes berýdi bastady. Búginde «Memlekettik jastar saıasatynyń júzege asyrylýy men volonterlik qoldaý sharalary», «COVID-2019» koronovırýsynan saqtaný sharalary jáne mindetti áleýmettik medıtsınalyq saqtandyrý júıesiniń tıimdilikteri» týraly tikeleı efır arqyly onlaın keńester berildi», - deıdi Serikbol Berikqoja.