Jambylda 92 myńnan astam bala Pfizer vaktsınasyn saldyrady
TARAZ. QazAqparat – Tarazda 12-17 jas aralyǵyndaǵy jasóspirimderdi, sondaı-aq júkti jáne bala emizetin áıelderdi Pfizer Comirnaty preparatymen vaktsınatsııalaý naýqany bastaldy, dep habarlaıdy QazAqparat tilshisi.
QR Bas sanıtar dárigeriniń qaýlysyna sáıkes Comirnaty BioNTech/Pfizer vaktsınasymen ımmýndaý bastaldy.
Oblystyq densaýlyq saqtaý basqarmasynyń basshysy Áset Qalıevtiń aıtýynsha, 11 qarashada Jambyl oblysyna 40 950 doza vaktsına jetkizildi.
Bul preparatpen 12-17 jastaǵy balalar jáne 16-dan 37 aptaǵa deıingi júkti áıelder, sondaı-aq emizetin analar egiledi.
21-28 kúnnen keıin vaktsınatsııanyń ekinshi kezeńi júrgiziledi. Osy ýaqytqa deıin halyqtyń nysanaly toptary arasynda aýqymdy aqparattyq-túsindirý jumysy júrgizilgen.
Bul jumystar jalǵasýda.
«Jasóspirimderdi vaktsınalaý balalardyń ata-anasynyń nemese zańdy ókilderiniń jazbasha aqparattandyrylǵan kelisimimen ǵana júrgiziletinin atap ótken jón. Bizdiń oblysta Pfizer vaktsınasymen 139 230 adamdy vaktsınalaý josparlanǵan. Onyń ishinde 92 960 adam - 12-17 jas aralyǵyndaǵy jasóspirimder, 46 270 - júkti jáne bala emizetin áıelder. Jaqyn arada óńir boıynsha 441 bilim mekemesiniń medıtsınalyq pýnktterinde vaktsınatsııa júrgiziledi»,-dedi basqarma basshysy.
Sondaı-aq, Áset Qalıev 22 qarashada revaktsınatsııa bastalatynyn atap ótti.
«Biz vırýstyń shtammynyń mýtatsııalanǵanyn kórip otyrmyz, sondyqtan, eń aldymen, 65 jastan asqan qart adamdarǵa, ımmýndyq júıesi álsiregen adamdarǵa, sondaı - aq aldyńǵy shepte júrgen medıtsına qyzmetkerlerine, bilim berý mekemeleri men ishki ister qyzmetkerlerine revaktsınatsııa jasaýdy usynamyz»,-dedi ol.
Jalpy, óńirde koronavırýsqa qarsy vaktsınamen barlyǵy 631 300 adamdy qamtý josparlanǵan.
Qazirgi ýaqytta oblystyń 576 myń turǵyny egildi, bul 91%-dan asady.
