Jambylda 81 eldi mekenge tabıǵı gaz tartý jumystary júrgizilip jatyr
TARAZ. QazAqparat – Jambyl oblysynda aldaǵy 7 jylda 200-ge jýyq eldimeken tabıǵı gazben qamtylady. Qazirgi tańda 81 eldi mekenge kógildir otyn tartý jumystary qolǵa alynǵan,- dep habarlaıdy QazAqparat tilshisi.
Búginde óńirde turǵyndardy tabıǵı gazben qamtý boıynsha atqarylyp jatqan jumystar jaıy erekshe nazarǵa alynǵan. Qazirgi kezde oblystaǵy eldi mekenderdiń 49 paıyzy nemese 185-i gazdandyrylǵan.
2027 jylǵa deıin osy oraıda 196 eldi mekendi kezeń-kezeńimen gazdandyrý jumystary josparlanýda eken. Bul oraıda da eldi mekenge tartylǵan gaz júıesi bola turyp, qosylý qunynyń qymbattyǵyna baılanysty kógildir otynǵa qoly jetpeı otyrǵan 31 myń halyq anyqtalǵan.
Oblys basshysynyń bastamasymen «Gaz jáne gazben jabdyqtaý» zańyna ózgeris engizilip, gaz saraptaýshysyn ornatý mindettelgennen keıin qosylý baǵasy 2-3 ese tómendetilip, atalǵan 30 myńnan asa halyq kógildir otynǵan qol jetkizýge múmkindik alǵan.
Sonymen qatar, Taraz qalasy mańyndaǵy 35 saıajaı-alqaptardyń 20-syn bıyl tabıǵı gazben qamtý sharalary atqarylýda. Qalǵany kelesi jyldyń josparyna bekitilgen. Ol ǵana emes, gazdandyrý boıynsha respýblıka kóleminde Jambyl oblysyna bólingen qarjynyń kólemi ózgelerden kósh ilgeri deýge bolady.
Atap aıtsaq, 2019-2021 jyldary oblystaǵy 81 eldimekendi gazben qamtýǵa respýblıkalyq bıýdjetten tıisti qarjy qarastarylǵan.
«Oblystaǵy 377 eldi mekenniń 49 paıyzy gazdandyrylǵan. Ústimizdegi jyly qosymsha 5 aýdanda 81 eldi mekendi (101 myń adam) gazdandyrý jumystary júrgizilýde. Jyl sońyna 11 eldi mekende jumystar aıaqtalady. Jalpy, osy eldi mekenderdi gazdandyrý 3 jylǵa josparlanyp otyr. Nátıjesinde, gazdandyrý 49 paıyzdan 70 paıyzǵa jetetin bolady»,- deıdi oblys ákimidiginiń energetıka jáne turǵyn úı kommýnaldyq-sharýashylyq basqarmasynyń basshysy Nurlan Aldamjarov.
