Jambylda 649 azyq-túliktiń talapqa saı emestigi anyqtaldy
Bul týraly óńirlik kommýnıkatsııalar qyzmetinde Jambyl oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Berik Jarqynbekov aıtty.
«Aǵymdaǵy jyldyń toǵyz aıynda ónim satyp alý josparyna sáıkes jalpy somasy 8 mıllıon 780 myń teńgege 168 saýda jáne qoǵamdyq tamaqtandyrý obektilerinde baqylaý júrgizildi. 4367 azyq-túlik ónimderi men halyq tutynatyn taýarlar iriktelse, onyń ishinde 649 synama Keden odaǵynyń tehnıkalyq reglamentteriniń talaptaryna sáıkes kelmeıtini anyqtalǵan. Sondaı-aq, departament pen onyń aýmaqtyq basqarmalary 2867 tekserý júrgizdi. Onyń ishinde 1855-i erekshe tártip boıynsha jáne 1012 jospardan tys oryn alǵan»,-dedi Berik Jarqynbekov.
Tekserý barysynda anyqtalǵan buzýshylyqtar úshin 67 mıllıon 534 myń teńge kóleminde 1461 ákimshilik aıyppul salynsa, onyń 1447-si boıynsha 65 mıllıon 451 myń teńgesi óndirip alynǵan. Zańnamany buzýshylyqtardy joıý týraly uıǵarymdardyń oryndalmaýy boıynsha 39 hattama, sondaı-aq obektilerdiń qyzmetin toqtata turýǵa 42 qujattar jasalyp, sot organdaryna qaraýǵa jiberilipti. Nátıjesinde 310 adam jumystan shettetilgen.
