Jambylda 5-synyp oqýshylarynyń kezekshi synypta oqýyna ruqsat berildi

TARAZ. QazAqparat – Jambyl oblysynyń bas memlekettik sanıtar dárigeriniń №40 qaýlysy shyqty. Sol arqyly buǵan deıingi qaýlyǵa birqatar ózgerister men tolyqtyrýlar engizilgen, dep habarlaıdy QazAqparat tilshisi oblys ákimdiginiń resmı saıtyna silteme jasap.

Jambyl oblysy turǵyndary arasynda koronavırýs ınfektsııasynyń odan ári taralýynan saqtandyrý maqsatynda jańa qaýly arqyly oblystyń bas memlekettik sanıtar dárigeriniń 2020 jylǵy 27 qazandaǵy №39 qaýlysyna birqatar ózgerister men tolyqtyrýlar engizilgen.

Atap aıtqanda, oqý jylynyń ekinshi toqsanynan bastap kontıngenti 300 oqýshyǵa deıingi qalalyq jáne aýyldyq mektepter dástúrli formatta oqytýǵa kóshedi. Tek synyptaǵy bala sanyn 15 oqýshydan asyrmaý qajet.

Al jalpy bilim beretin mektepterde - 1 synyptan 5 synypqa deıin, halyqaralyq mektepterde - 7 synypqa deıin kezekshi synypta oqytýǵa ruqsat berilgen.

Sondaı-aq, teatrlardyń jumysyna tyıym salynbaıtyn boldy. Alaıda, zaldy tek 50 paıyzǵa deıin toltyryp, kórermen sanynyń 100 adamnan aspaýyn qadaǵalaý kerek.

Kúsheıtilgen sanıtarııalyq-dezınfektsııalyq jáne maska rejımi, áleýmettik qashyqtyq qatań saqtalady.

Osy sekildi belgilengen talaptardy saqtaı otyryp, dinı obektiler de (meshitter, shirkeýler, soborlar, sınagogalar jáne basqalar) jumys jasamaq.

Degenmen, zaldy tek 30 paıyz toltyryp, kelýshilerdiń sanyn 100 adamnan asyrmaý qajet. Kkúsheıtilgen sanıtarııalyq-dezınfektsııalyq rejım saqtalýy tıis.