Jambylda 47 zańdy ókil ata-ana quqyǵynan aıyryldy

TARAZ. QazAqparat – Jambyl oblysynyń jastary arasynda kámeletke tolmaǵandar tarapynan jasalatyn qylmystar men quqyq buzýshylyqtardyń aldyn alý jáne temeki men spırttik ishimdikterdi satýdyń jolyn kesý maqsatynda apta saıyn reıdtik is-sharalar ótkizilýde, dep habarlaıdy QazAqparat tilshisi.

Reıdtik sharalarǵa kámeletke tolmaǵandardyń isteri jáne olardyń quqyqtaryn qorǵaý jónindegi komıssııa músheleri, kámeletke tolmaǵandardyń isteri jónindegi bólimderdiń ınspektorlary, bilim berý mekemeleriniń ókilderi, eriktiler jáne ózge de múddeli qyzmetter qatysady. Aǵymdaǵy jyldyń 9 aıynda kámeletke tolmaǵandar arasyndaǵy quqyq buzýshylar sany azaıdy. Aýyr dene jaraqatyn salý, bótenniń múlkin urlaý jáne buzaqylyq derekteri boıynsha tómendeý kórsetkishteri tirkeldi.

Jyl basynan beri ótkizilgen 3 myńnan astam reıdtiń qorytyndysy boıynsha, 5079 ata-ana men ózge de tulǵalar ákimshilik jaýapkershilikke tartyldy. Kámeletke tolmaǵandardy beıimdeý ortalyǵyna 376 kámeletke tolmaǵan jasóspirim ornalastyryldy. Devıantty minez-qulyqty balalarǵa arnalǵan mamandandyrylǵan mektepke 19 jasóspirim ornalastyrylyp, 47 zańdy ókil ata-analyq quqyǵynan aıyryldy.

Sondaı-aq, úıden óz erkimen ketken 114 bala ata-analaryna qaıtaryldy. Kámeletke tolmaǵandarǵa alkogol ónimderin satýdyń 81 deregi anyqtaldy. Іshki ister organdarynyń esebine 235 kámeletke tolmaǵan jasóspirim qoıyldy. Sondaı-aq ómirlik qıyn jaǵdaıda qalǵan tulǵalarǵa kómek kórsetý maqsatynda olar medıtsınalyq-áleýmettik esepke qoıyldy. Bul is-sharalar turaqty negizde ótkizilýde.