Jambylda 46 jastaǵy áıeldi urlap áketken kúdiktiler quryqtaldy

TARAZ. QazAqparat – Jambyldyq polıtseıler adam urlyǵy qylmysyn izin sýytpaı ashty,- dep habarlaıdy QazAqparat tilshisi.

Jambyl oblysy Polıtsııa departamentiniń bastyǵy Janat Súleımenov óziniń áleýmettik jelidegi paraqshasynda polıtsııaǵa Taraz qalasynyń turǵyny habarlasyp, 46 jastaǵy jaqyn týysynyń kenetten joǵalyp ketkeni týraly aıtqanyn habarlady.

«Atalǵan derek boıynsha Qylmystyq kodekstiń 125-babymen (Adam urlaý) shuǵyl túrde sotqa deıingi tergeý amaldary bastaldy jáne Polıtsııa departamentiniń jedel-tergeý toby quryldy. Polıtsııa qyzmetkerlerimen júrgizilgen kásibı jedel-izdestirý is-sharalarynyń nátıjesinde eki kúdikti anyqtalyp, ustaldy» delingen jazbada.

Jábirlenýshi áıeldi polıtseıler Jambyl aýdanyndaǵy aýyldardyń birinen tapty.

Polıtsııa general-maıory J. Súleımenov atalǵan qylmystyq istiń tergep-tekserý barysy erekshe baqylaýynda ekenin atap ótti.