Jambylda 400 megavattyq iri kún elektr stantsııasy salynady
TARAZ. QazAqparat – Jambyl oblysynyń ákimi Asqar Myrzahmetov túrkııalyq «Global Stroı» jaýapkershiligi shekteýli seriktestiginiń ókilderimen kezdesti. Atalmysh kompanııa ókilderi óńirimizde 400 megavattyq kún elektr stantsııasyn salýǵa nıetti, dep habarlaıdy QazAqparat tilshisi.
Asqar Isabekuly jergilikti bılik ınvestorlardy barynsha qoldaýǵa ázir ekendigin jetkizip, qajetti jaǵdaılar jasalatynyn aıtty. Ol úshin aldymen qajetti jer kólemin naqtylap, stantsııa salýǵa qolaıly aımaqty anyqtaý sharalaryn júrgizý kerektigine kóńil bóldi. Sondaı-aq, óńir basshysy oblysta qurylysy júrip, jumys istep jatqan jel, kún elektr stantsııalaryn mysalǵa ala otyryp, aımaqtyń balamaly energııa óndirý baǵytynda aıtarlyqtaı tájirıbesi bar ekendigine nazar aýdartty.
Óz kezeginde «Global Stroı» JShS-niń quryltaıshysy Býlgan Ahmet Dıýran men bas dırektory Ýıgýn Eıýp Jambyl oblysynyń kún sáýlesi kóp túsetin óńir bolǵandyqtan tańdaý túsip otyrǵanyn, salynatyn stantsııaǵa jel men kúnniń qozǵalysyna yńǵaıly jańa tehnologııalardy paıdalanatyndaryn aıtyp, jumysty bastaýǵa daıyn ekendikterin jetkizdi. Sondaı-aq, olar bolashaqta Qazaqstanda 8 myń megavattyq stantsııa salýdy josparlap otyrǵandaryn tilge tıek etti.
Aıta keteıik, buǵan deıingi kezdesýde taraptar birlesip jumys isteý jolynda ortaq memorandýmǵa qol qoıyp, kelisimge kelgen bolatyn.
