Jambylda 4 iri qarany atyp, áketip bara jatqan barymtashylar ustaldy
TARAZ. QazAqparat - Jambyl oblysy Moıynqum aýdanynan mal urlap bara jatqan ákki barymtashylar qolǵa tústi. Olar óriste jaıylyp júrgen maldardy atyp óltirip, áketip bara jatqan, dep habarlaıdy QazAqparat.
Tártip saqshylary kúdikti avtokólikti «Batys Eýropa - Batys Qytaı» avtomagıstralinde toqtatyp, T. Rysqulov aýdanynyń eki turǵynyn ustady. Oblystyq Polıtsııa departamentiniń málimetinshe, tekserý barysynda kólikten 4 sıyrdyń tutas eti men pyshaq, balta jáne atylǵan oqtyń birneshe gılzalary tabyldy. Olar urlanǵan mal etin shujyq shyǵaratyn tsehtardyń birine ótkizýdi kózdegen. Buǵan deıin osyndaı áreketi úshin birneshe ret isti bolǵan urylar kinálaryn moıyndady. Sotqa deıingi tergeý sharalary júrýde.
- Moıynqum aýdany Býrylbaıtal aýylynan jalpy quny 2 mıllıon teńgeni quraıtyn 7 sıyrdy jaıylyp júrgen jerinen atyp óltirgen. Kúdiktiler óli maldardy kólikterine syıǵansha artqan. Sımaǵandaryn qaldyryp ketken. Departamentte ótken jyly mal urlyǵy boıynsha 347 fakt tirkelip, onyń 201-i ashylǵan, - deıdi oblystyq polıtsııa departamenti baspasóz qyzmetiniń jetekshisi Gulsara Muhtarqulova.
