Jambylda 33 sottalýshy radıkaldy kózqarasynan aınyǵan
Oblys ákimi Berdibek Saparbaevtyń tóraǵalyǵymen oblystaǵy ekstremızm jáne terrorızmge qarsy kúres máseleleri jóninde májilis ótti. Basqosýda baıandama jasaǵan oblys ákimdigi din isteri basqarmasynyń basshysy Jangeldi Omarov «2018-2022 jyldarǵa arnalǵan ekstremızm jáne terrorızmge qarsy is-qımyl» baǵdarlamasynyń maqsatty ındıkatorlary men tarmaqtarynyń oryndalýy týraly habarlady.
Basqarma basshysynyń aıtýynsha, dinı toptar men qaýymdastyqtardyń radıkaldyq ıdeologııaǵa qarsy ımmýnıtetin qalyptastyrýǵa baǵyttalǵan aqparattyq-túsindirý jáne nasıhat jumysy 80 paıyzǵa oryndalǵan. Destrýktıvti toptardyń 11 kóshbasshysymen áńgime ótkizilip, úsh adam qoǵamǵa beıimdelgen.
Sondaı-aq, sottalǵandardyń radıkaldy ıdeologııa men radıkalızatsııaǵa qarsy ımmýnıtetin nyǵaıtýǵa baǵyttalǵan aqparattyq-túsindirý jumysymen qamtý 100 paıyzdy quraǵan. 2018-2019 jyldary da bul kórsetkish osy deńgeıde bolǵan desek, nátıjesinde 33 sottalýshy radıkaldy kózqarasynan qaıtqan.
«Búginde karantın sharalaryna baılanysty túzetý mekemelerinde túsindirý jumystary onlaın rejımde júrgizilýde. Esepti kezeńde 21 onlaın sabaq jáne eki jeke áńgime ótti. Karantın rejımi jeńildegennen keıin biz bul jumystardy jalǵastyramyz»,-dedi basqarma basshysy.
Osy turǵyda aqparattyq-túsindirý toptary teolog-mamandarmen 80 paıyzǵa qamtylǵany aıtyldy. Top quramynda 26 dintanýshy, bir fılosof jáne bir fılolog jumys isteýde.
