Jambylda 3185 adam emhanany erkin tańdaý quqyǵyn paıdalandy
«Aldaǵy ýaqytta emhana arqyly tirkeý toqtatylady. Bul shara júıeli máselelerdi joıyp, qyzmetin asyra paıdalaný jáne falsıfıkatsııa faktileriniń aldyn alýǵa múmkindik beredi. Buǵan alańdaýdyń qajeti joq. Tirkelý úshin emhanaǵa baryp úırengen azamattar Halyqqa qyzmet kórsetý ortalyqtarynyń qyzmetine júgine alady. Atalǵan ortalyqtardyń Connection Point bólimsheleri arqyly emhanaǵa tirkelýge bolady. Sondaı-aq, «Egov.kz» elektrondyq portalynyń Telegram boty arqyly Smartfonnyń kómegimen birer mınýtta tirkelýine múmkindigi bar», - dedi fılıal dırektory.
Eger azamattar naýqan kezinde emhanasyn aýystyryp úlgermese, jylyna bir ret erkin tańdaý quqyǵyn paıdalanyp, emhana aýystyrýyna múmkindigi bar. Oblysta bul múmkindikti bıyl 3 185 adam paıdalanyp, erkin tańdaý jasaǵan.
«Turǵyndar qonys aýdarǵanda, emhana jabylyp qalsa nemese MSQ-men kelisimshartty buzsa, jaqyn mańnan jańa emhana salynsa, emhana qyzmetine qatysty shyǵyndardy jabatyn erikti medıtsınalyq saqtandyrý kelisimshartyn bekitken jaǵdaıda basqa emhanaǵa aýysa alady. Qazir ózińizdi ǵana emes, balalardy da onlaın rejımde tirkeýge múmkindik týdy. Júıe barlyq málimetterdi qysqa merzim ishinde, avtomatty túrde shyǵaryp beredi. Bul protsesti barynsha jeńildetedi ári artyq qujat talap etpeıdi. Bıyl tirkeý naýqanyna oblysymyzdyń 22 medıtsınalyq uıymy qatysty, onyń 6-aýy - jekemenshik. Oblysta 3 113 turǵyn dástúrli túrde emhanaǵa tikeleı habarlasyp tirkelse, 72 adam «Egov.kz» elektrondy portaly arqyly tirkelgen», - deıdi Mavlıýda Bokaeva.
Aıta ketý kerek, emhanany erkin tańdaý quqyǵyn paıdalanǵan 3185 azamattyń 11,1 paıyzy - memlekettik emhanany, 88,9 paıyzy - jekemenshik emhanany tandaǵan.
Eske sala ketsek, QR Tuńǵysh Prezıdenti kúnine oraı Jambyl oblystyq jedel járdem stansasyna 27 avtokólik kilti tabystaldy. Sharada Jambyl oblysy ákiminiń orynbasary Erkebulan Daýylbaev medıtsına salasynda atqaralyp jatqan aýqymdy jumystarǵa toqtalyp, oblysta memlekettik-jekeshelik áriptestik aıasynda qajetti 95 nysan salý josparlanyp, bıyl 30 nysan, 2019 jyly - 40 nysan, 2020 jyly - 25 nysan salynatynyn jetkizdi.
Oblystyq densaýlyq saqtaý basqarmasynyń málimetinshe, oblysta medıtsına salasyn tsıfrlandyrýǵa erekshe mán berilip otyr. Qazan aıy boınysha, aımaqta 5 260 medıtsınalyq jumys orny bar bolsa, sonyń 4 999-y kompıýtermen qamtamasyz etilgen. Júz paıyzdyq kórsetkishke qol jetkizý úshin oblys bıýdjetinen 152 mln teńge bólinip, 880 kompıýter satyp alyndy. Osy qarjyǵa taǵy 133 kompıýter satyp alynady.
Ǵıbrat Sembaı
