Jambylda 3 myńǵa jýyq stýdent jataqhanaǵa muqtaj
«Qarjy ortalyǵy» AQ stýdentter jataqhanasy boıynsha operatorlyq etý departamentiniń sarapshysy Alpamys Satybaldınniń sózinshe, Jambyl oblysynda jataqhanaǵa muqtaj stýdent jastardyń sany 2 780-nen asady. Onyń 2030-y óńirdegi úsh joǵary oqý ornynda, 750-i kolledjderde bilim alady. Sebebi óńirdegi qurylys qarqyny demografııalyq jáne kóshi-qon úderisterimen sáıkes kelmeıdi.
Jambyl oblysyndaǵy úsh joǵary oqý orny máseleni sheshýge qulshyna kirisipti. Máselen, Taraz memlekettik ýnıversıteti 500 oryndyq jataqhananyń qurylysyn júrgizýde. Taraz ınnovatsııalyq-gýmanıtarlyq ýnıversıtetiniń basshylyǵy burynǵy «Taraz» meımanhanasynyń bes qabatty ǵımaratyn satyp alyp, bes júz oryndyq stýdentter jataqhanasyna laıyqtap, qaıta jańǵyrtýdan ótkizýde. Al Taraz memlekettik pedagogıkalyq ýnıversıtetiniń 500 oryndyq jataqhanasy bıyl stýdentterdi qabyldady. Alpamys Satybaldınniń aıtýynsha, qalyptasqan jaǵdaıdy memlekettik jekemenshik áriptestik aıasynda sheshý qarastyrylǵan.
«Bul jobaǵa qatysyp, memlekettik tapsyrystar alý «Qarjy ortalyǵy» AQ-ǵa ótinish berip, qujattar tapsyrýdan bastalady. Bilim jáne ǵylym mınıstrligi, «Qarjy ortalyǵy» AQ jáne áleýetti jetkizýshi arasynda aldyn ala úshjaqty kelisimder jasalady. Memlekettik jekemenshik áriptestik aıasynda qurylys nysany áleýetti jetkizýshi kúshimen eki jyl ishinde paıdalanýǵa berilýge tıis. Bir eskererlik jaıt, memleket tarapynan sýbsıdııalar nysan paıdalanylýǵa berilgennen keıin, kezeń-kezeńimen tólene bastaıdy», – deıdi Alpamys Satybaldın.
